Հզոր երկրաշարժ Թուրքիայում․ երկրի փոխնախագահը թարմ տվյալներ է ներկայացրել․ ԼՈՒՍԱՆԿԱՐՆԵՐ

Թուրքիայի հարավ-արևելքում՝ Սիրիայի հետ սահմանին տեղի ունեցած երկրաշարժի հետևանքով զոհերի և վիրավորների թիվը շարունակում է աճել։ Տեղական լրատվամիջոցների հաղորդմամբ՝ Թուրքիայի փոխնախագահ Ֆուադ Օքթայը հայտարարել է, որ 7,4 մագտիտուդով երկրաշարժի հետևանքով երկրի 10 քաղաքներում զոհվել է 284 մարդ, վիրավորվել՝ 2,323-ը։

«Մարաշում կորցրինք մեր 70 քաղաքացիների։ Կանխատեսում ենք, որ այս թվերը կավելանան։ Մարաշում 200 վիրավոր կա, 300 շենք է ավերվել։ Հաթայում կա 4 զոհ, 7 վիրավոր, 200 ավերածություն։ Օսմանիեում 20 անհետ կորած, 200 վիրավոր և 83 ավերված շենք կա, Ադըյամանում՝ 13 անհետ կորած, 22 վիրավոր, 100 ավերված շենք, 14 մահ Դիարբեքիրում, Ուրֆայում՝ 18 անհետ կորած, 200 վիրավոր, 60 ավերված շենք, Անթեփում՝ 80 զոհ և 581 ավերված շինություն, Քիլիսում՝ 8 մահ, 50 ավերածություն, Ադանայում՝ 10 զոհ, 118 վիրավոր, Մալաթիայում՝ 47 զոհ, 550 վիրավոր, 300 ավերված շինություն։ Ընդամենը կա 284 զոհ, 2,323 վիրավոր, 1,710 ավերված շինություն»,- հայտնել է Օքթայը։

Նա հավելել է, որ վտանգավոր են նաև հետցնցումները, որոնց հետևանքով վնասված շենքերը կարող են փլուզվել։

Հիշեցնենք, որ երկրաշարժը տեղի է ունեցել առավոտյան ժամը 4-ի սահմաններում, էպիկենտրոնը Քահրամանմարաշի Փազարջիկ բնակավայրն է։ 7,4 մագնիտուդով երկրաշարժը տեղի է ունեցել 7 կիլոմետր խորության վրա։

Էմմա Չոբանյան