Մեր ուժերը բավարար չեն լայնածավալ մարտական գործողությունների համար․ Արմեն Խաչատրյան․ ՏԵՍԱՆՅՈՒԹ

«Մենք չենք հասցրել կատարել այն բարեփոխումները, որոնք անհրաժեշտ էին՝ խնդիրները լուծելու համար,- այսօր խորհրդարանում լրագրողների հետ զրույցում այս մասին նշեց «Քաղաքացիական պայմանագիր» խմբակցության պատգամավոր, ԱԺ պաշտպանության և անվտանգության հարցերի հանձնաժողովի փոխնախագահ Արմեն Խաչատրյանը։

«Մեր բանակը 44-օրյա պատերազմի ժամանակ բավականին լավ կռվել է, բայց ուժերը եղել են խիստ անհամաչափ։ Ուղղակի պետք է կանխատեսեինք նման իրավիճակ և տասնամյակներ առաջ պատրաստվեինք այդ օրվան»,- նշեց Խաչատրյանը։

Պատգամավորի դիտարկմամբ՝ սեպտեմբերյան դեպքերից հետո բանակի բարոյահոգեբանական վիճակը անկում չի ապրել։ «Ես տեսել եմ, որ զինվորականների բարոյահոգեբանական վիճակը շատ ավելի լավ է, քան՝ 44-օրյայում: Բանակն իր ուժերի վրա ավելի շատ է վստահ, քան՝ 44-օրյա պատերազմի ժամանակ»,- ասաց Խաչատրյանը:

Անդրադառնալով հարցին՝ բանակը պատրա՞ստ է դիմագրավել էսկալացիային՝ պատգամավորն արձագանքեց.«Պետք է վերլուծություն անենք՝ ինչքա՞ն տարածք ունենք, ինչքա՞ն բնակչություն ունենք, տնտեսական ի՞նչ միջոցներ ու ռեսուրսներ ունի Հայաստանը, ի՞նչ կորուստներ ենք ունեցել և, ամենակարևորը, ո՞ւմ հետ է էսկալացիան լինելու՝ Ադրբեջանի՞, Թուրքիայի՞, թե՞ այլ երկրների:

Մի շարք խնդիրներ մեր բանակը ի զորու է ի կատար ածել, բայց լայնածավալ մարտական գործողությունների համար մեր ուժերը չեն բավականացնի, սա պարզից էլ պարզ է: Դրա համար պետք է ունենանք յուրահատուկ պրոֆեսիոնալ բանակ»։

Մանրամասները՝ տեսանյութում։