08.12.2025 | 21:27
Քոնոր Մաքգրեգորը ցանկանում է մենամարտել Իսլամ Մախաչևի հետ
Ո՞ր փուլում է Գյումրին «չոր նավահանգստի» վերածելու, 20-40 հազար աշխատատեղ ստեղծելու ծրագիրը
Տնտեսություն
01.02.2023 | 14:33
Factor.am-ը ՀՀ տարածքային կառավարման և ենթակառուցվածքների նախարար Գնել Սանոսյանից հետաքրքրվեց, թե ո՞ր փուլում է Գյումրին «չոր նավահանգստի» վերածելու կառավարության ծրագիրը․ այն ի վերջո իրագործվելո՞ւ է, թե՞ ոչ։ Մի քանի տարի է՝ խոսվում է այս ծրագրի մասին, սակայն գործնական ոչ մի քայլ քայլ դեռ կատարված չէ։
«Հեշտ պրոցես չէ, հեշտ ծրագիր չէ, բայց իրականանալու պարագայում այստեղ ամբողջովին միջավայրը՝ հատկապես բիզնես միջավայրը տնտեսական առումով կփոխվի»,-ասաց նախարարը։
Ծրագրի ձգձգումը հուսախաբ չի անում նաև Գյումրու քաղաքապետ Վարդգես Սամսոնյանին։
Նա մեզ հետ զրույցում նշեց, որ եթե խոչընդոտներ չլինեն, ծրագիրը հաստատ կիրագործվի․ 20-40 հազար աշխատատեղ կստեղծվի։
«Հավատով ու հույսով պիտի լցվենք, որ իրականացվի, այնպես չէ, որ անիրատեսական է»,-ասաց Վարդգես Սամսոնյանը։
Գյումրու քաղաքապետի հաշվարկով, կառավարության խոստացած 20-40 հազար աշխատատեղերի բացման դեպքում, գուցե, հարևան մարզերի բնակիչներն էլ գան հանրապետության երկրորդ քաղաքում աշխատելու։
«Եթե համարենք, որ ունենք մոտ 200 հազար բնակչություն, 20 հազար աշխատատեղ ստեղծելու դեպքում մարզի 10 տոկոսի աշխատատեղի խնդիրը կլուծվի, իսկ 40 հազարի դեպքում՝ 20 տոկոսի»,-ասում է Վարդգես Սամսոնյանը։
ՀՀ Էկոնոմիկայի նախարարության պաշտոնական տեղեկատվության համաձայն, «Չոր նավահանգիստը» կամ արդյունաբերական պարկը կտեղակայվի «Շիրակ» օդնավակայանի մոտակայքում՝ Հյուսիս-հարավ ճանապարհի վրա։
«Չոր նավահանգիստը» կարելի է համարել ներքին առևտրի բաշխման համակարգի էական մաս: Ներքին առևտրի բաշխման համակարգերը կարող են մշակվել և մշակվում են բոլոր տեսակի բեռների, այսինքն՝ բեռնարկղային, ոչ բեռնարկղային, առանց փաթեթավորման և մեծաքանակ բեռնափոխադրումների համար։
Երկարաժամկետ հեռանկարում «Չոր նավահանգիստները» կապահովեն այն առավելությունները, որ առևտրային բեռներն ուղղակիորեն կտեղափոխվեն և կմաքսազերծվեն մի երկրի ներքին նավահանգստի և մեկ այլ երկրի ներքին նավահանգստի միջև»,-նշված է ՀՀ էկոնոմիկայի նախարարության պաշտոնական տեղեկատվության մեջ:
Ծրագիրը իրավական ակտերի նախագծերի հրապարակման միասնական կայքում հանրային քննարկում է անցել 2022-ի դեկտեմբերի 12-ից 17-ը։
Արմիկ Մովսիսյան
