Կլիչկոն Կիևի բնակիչներին խորհուրդ է տվել ժամանակավորապես հեռանալ քաղաքից

Կիևի քաղաքապետ Վիտալի Կլիչկոն,ռուսական հարձակումների ուժգնացման ֆոնին առաջարկել է, որ Ուկրաինայի մայրաքաղաքից դուրս ապրող ընկերներ կամ հարազատներ ունեցող բնակիչները ժամանակավորապես լքեն քաղաքը։ Կլիչկոն այս հայտարարությունն արել է AFP-ին տված հարցազրույցում, գրում է DW-ի ռուսական ծառայությունը։

«Ամեն օր նոր հաղորդագրություններ են ստացվում ավերված շենքերի, վիրավորների և զոհերի մասին, քանի որ մեր քաղաքի վրա հարվածներն ուժգնանում են։ Այսօր դա գոյատևման հարց է»,- ասել է Կլիչկոն։

Նա զգուշացրել է, որ եթե ջրամատակարարման համակարգը խափանվի ռուսական հարձակումների պատճառով, Կիևում կարող է «բավականին լայնածավալ» ճգնաժամ առաջանալ։ Միաժամանակ, Կլիչկոն ընդգծել է, որ ինքը լիակատար տարհանման կոչ չի անում։

«Դա Պուտինի նպատակն է։ Նրա լավագույն սցենարն այն է, որ մենք բոլորս հեռանանք և մեր դատարկ քաղաքներն ու ամբողջ երկիրը հանձնենք նրան»,- ասել է Կլիչկոն։

Կիևի իշխանությունները ձմռանը պահեստային ջեռուցման համակարգեր են կառուցում և վառելիքի, սննդի և խմելու ջրի պաշարներ կուտակում, ասել է քաղաքապետը։ Սակայն, անկախ նրանից, թե որքան լավ են Կիևի իշխանությունները և բնակիչները պատրաստվել, «եթե հակաօդային պաշտպանությունը ձախողվի, մենք կարող ենք հայտնվել ամենավատ սցենարի մեջ», ասել է Կլիչկոն։

Սեպտեմբերից Ռուսաստանն ակտիվացրել է Կիևի վրա հարձակումները։ Հոկտեմբերի սկզբին էլ ռուսական զորքերը սկսել են թիրախավորել Դնեպր գետի վրայով անցնող կամուրջները, որոնք կապում են Կիևի աջ և ձախ ափերը։ Այս կամուրջները նախկինում թիրախ չէին դարձել։ Թիրախավորվել են նաև էներգետիկ և կապի օբյեկտները, ինչպես նաև երկաթուղային ենթակառուցվածքները։

Հոկտեմբերի 3-ին Ուկրաինայի նախագահ Վլադիմիր Զելենսկին հայտարարել էր Ռուսաստանի նոր ավիահարվածների ռազմավարության մասին, որը Կրեմլն օգտագործում է՝ ուկրաինացիներին ստիպելու հեռանալ Կիևից և այլ խոշոր քաղաքներից։

Թարգմանությունը՝ Էմմա Չոբանյանի