«Վագները» հրթիռներ է ստացել ԿԺԴՀ-ից․ Ստոլտենբերգ

Հյուսիսային Կորեան հրթիռներ է մատակարարել «Վագներ» ռազմականացված մասնավոր կազմակերպության ռուս վարձկաններին, որոնք մասնակցում են Ուկրաինայի դեմ պատերազմին։ Այս մասին ՆԱՏՕ-ի գլխավոր քարտուղար Յենս Ստոլտենբերգն ասել է Սեուլի համալսարանի ուսանողների առջև ելույթի ժամանակ, հայտնում է դաշինքի կայքէջը։

«Հյուսիսային Կորեան հրթիռներ է մատակարարել ռուսական «Վագներ» խմբավորմանը, ինչը ավելի է խթանում Ռուսաստանի ագրեսիվ պատերազմն Ուկրաինայի դեմ: Նախագահ Պուտինը պատերազմը սկսել է գրեթե մեկ տարի առաջ՝ երկիրը վերահսկողության տակ վերցնելու և մարդկանց ազատությունից զրկելու համար: Ի պատասխան՝ ՆԱՏՕ-ն և ՆԱՏՕ-ի դաշնակիցները, ինչպես նաև մեր գործընկերներն ամբողջ աշխարհում, ներառյալ Հարավային Կորեան, դատապարտեցին այս անօրինական և չարդարացված պատերազմը։ Եվ մենք աննախադեպ օգնություն ենք ցուցաբերում Ուկրաինային»,- ասել է Ստոլտենբերգը։

Դաշինքի գլխավոր քարտուղարը համոզված է, որ այդ աջակցությունը մեծ նշանակություն ունի ուկրաինացիների համար՝ «օգնելով նրանց ոչ միայն գոյատևել, այլև հետ մղել ռուս զավթիչին և ազատագրել իրենց տարածքը»։

«Մենք պետք է աջակցենք Ուկրաինային այնքան ժամանակ, որքան անհրաժեշտ է: Որովհետև եթե նախագահ Պուտինը հաղթի, նրա և մյուս ավտորիտար առաջնորդների համար պարզ կդառնա, որ նրանք կարող են ուժի միջոցով հասնել իրենց ուզածին: Սա աշխարհն ավելի վտանգավոր կդարձնի, իսկ մեզ՝ ավելի խոցելի», – ընդգծել է նա։

Տաթև Ֆռանգյան