Խնդրահարույց վարկերից ավելի շատ են արտարժույթով վարկերը․ Պապոյանը կոչ արեց եվրոյով վարկեր չվերցնել․ ՏԵՍԱՆՅՈՒԹ

ՔՊ պատգամավորներն առաջարկում են բանկերին, վարկային կազմակերպություններին արգելել ՀՀ ռեզիդենտ քաղաքացիներին վարկեր տալ արտարժույթով:

Այսօր ԱԺ ֆինանսավարկային և բյուջետային հարցերի հանձնաժողովի նիստում «Արժութային կարգավորման և արժութային վերահսկողության մասին» օրենքում փոփոխություններ կատարելու մասին» նախագծի քննարկման ժամանակ համահեղինակ Գևորգ Պապոյանը նշեց, որ մեր հասարակությունը մեքենա, տուն, հող, ինչի գին հարցնում են, առաջինը դոլարով են ընկալում ու ֆիքսում․ «Մենք պիտի այդ մտածողությունից հրաժարվենք»:  

«Ոչ մի երկրում այդքան շատ իրար չեն խառնվում փոխարժեքի տատանումներից, որքան Հայաստանում: Դրամային եկամուտ ունեցող մարդը ինչի՞ պիտի մտածի փոխարժեքի տատանումների մասին: Դա բերում է հավելյալ բաների, որովհետև երբ մարդիկ դոլարային ավանդներ են ունենում, դոլարային վարկեր են ունենում, իրենք փոխարժեքի փոքր տատանումների ժամանակ սկսում են ոչ մասնագիտական, հաճախ անկանոն ֆինանսական շարժումներ անել, որոնք էլ ավելի մեծ ու վատթար հետևանքների են բերում: Իսկ երբ մարդը չունի եվրոյով կամ դոլարով վարկ, ինքը չի անի այդ անկանոն գործողությունները և իրենց ազդեցությունն էլ փոխարժեքի վրա այդքան մեծ չի լինելու: Այդ տրամաբանությամբ օրենքի նախագիծը ներկայացրել ենք»,- նշեց պատգամավորը։ 

Պապոյանը քաղաքացիներին կոչ արեց հատկապես մեծ տատանողականություն ունեցող արտարժույթներով, օրինակ, եվրոյով վարկեր չվերցնել։ 

«400 դրամ եղավ եվրոն մոտ 2 ամիս առաջ ու այդ պահին վերցրած վարկերը արդեն իսկ մոտ 5%-ով թանկացել են: Սա շատ վտանգավոր տենդենց է, վաղը կարող է ևս 5%-ով թանկանալ: Սա վտանգավոր միտում է։ 

Մեր նախագիծն ուղղված է կայունությանը և արտարժութային ցնցումների ժամանակ, այսպես ասած, այնպիսի իրավիճակներին, որ մենք չունենանք տնտեսական ճգնաժամեր: Եթե հազարավոր քաղաքացիներ կանգնեն իրենց վարկերը փակելու խնդրի առաջ, դա կբերի տնտեսական ճգնաժամերի՝ իրենցից բխող հետևանքներով»,- ընդգծեց պատգամավորը։ 

Մանրամասները՝ տեսանյութում։