Թուրքիայում աջ ծայրահեղական կուսակցության առաջնորդը սիրիացի փախստականներին արտաքսելու՝ «Ավտոբուս դեպի Դամասկոս» արշավ է սկսել

Թուրքիայի աջ ծայրահեղական «Հաղթանակ» (Zafer Parti) կուսակցության առաջնորդ Ումիթ Օզդաղը սկսել է «Ավտոբուս դեպի Դամասկոս» անվանումով նոր արշավ՝ ուղղված սիրիացի փախստականներին երկրից արտաքսելուն, գրում է Turkish Minute-ը։

Թվիթերում Օզդաղի կողմից հրապարակված քարոզչական տեսանյութում, որը Թուրքիայում փախստականների դեմ պայքարի «առաջամարտիկներից» է, կուսակցության կողմնակիցներին խնդրել է կիսվել փախստականների անուններով և նվիրատվություն անել «Հաղթանակ» կուսակցությանը, որպեսզի փախստականների կարողանան նստեցնել ավտոբուսներն ու արտաքսել Սիրիա:

«Սկսվել է «Հաղթանակի ավտոբուսների» միակողմանի տոմսերի վաճառքը դեպի Դամասկոս։ Կիսեք փախստականների անունները, որոնց ցանկանում եք ուղարկել, և մենք կկատարենք ամրագրումը ձեզ համար»,- նշել է նա։

Օզդաղը, որը 2018 թվականի համընդհանուր ընտրություններում պատգամավոր է ընտրվել İYİ (Լավ) կուսակցությունից, հեռացվել է այս կուսակցությունից՝ 2020 թվականին կառույցի վարչակազմի հետ մի շարք վեճերի պատճառով։ Հետագայում նա հիմնել է իր սեփական կուսակցությունը և դեռևս պատգամավոր է, այդպիսով՝ օգտվում է պատգամավորական անձեռնմխելիությունից:

Նշենք, որ սա առաջին դեպքը չէ, երբ Օզդաղը թիրախավորում է սիրիացի փախստականներին։ Հունիսին նա մեկնել էր սահմանամերձ Հաթայ նահանգ՝ սահմանին «խորհրդանշական ական» տեղադրելու, իբր, սիրիացի փախստականների մուտքը Թուրքիա կանխելու նպատակով: Օզդաղին և նրա կուսակիցներին տեղափոխող ավտոբուսը ոստիկանության և ժանդարմերիայի կողմից կանգնեցվել է Հաթայ ժամանելուց առաջ, և նահանգապետարանի հրամանով արգելվել է քաղաք մտնել։ Թուրքիայում սիրիացի շուրջ 4 մլն փախստականները հաճախ են թիրախավորվում Օզդաղի կողմից, որը նրանց պատասխանատու է համարում երկրում առկա սոցիալական և տնտեսական խնդիրների համար։

Էմմա Չոբանյան