Ռուսաստանի ՊՆ-ն հայտարարել է Սոլեդարի գրավման մասին․ Ուկրաինան պնդում է, որ մարտերը շարունակվում են

Ռուսաստանի Պաշտպանության նախարարությունը հայտարարել է Սոլեդարը գրավելու մասին։ Գերատեսչության պաշտոնական ներկայացուցիչ Իգոր Կոնաշենկովի խոսքով՝ ռուսական ստորաբաժանումները Սոլեդարը գրավել են հունվարի 12-ի երեկոյան։ Նրա խոսքով՝ սա թույլ է տալիս կտրել Բախմուտում ուկրաինական զորքերի մատակարարման ուղիները, «այնուհետև արգելափակել ու կաթսայի մեջ մտցնել այնտեղ մնացած Ուկրաինայի զինված ուժերի ստորաբաժանումները», գրում է BBC-ի ռուսական ծառայությունը։

Երկու օր առաջ Սոլեդարի գրավման մասին հայտարարեց նաև «Վագների» ղեկավար Եվգենի Պրիգոժինը, որի վարձկաններն ակտիվորեն մասնակցում են այս ուղղությամբ մարտերին։ Սակայն նրա խոսքերը չհաստատեցին ո՛չ ուկրաինացի, ո՛չ էլ ռուս զինվորականները։

Ուկրաինական կողմը մինչ այժմ հերքում է Սոլեդարի կորուստը։

«Մարտերը շարունակվում են բուն քաղաքում, տեղեկատվությունը, որ ուկրաինական ուժերը լքել են Սոլեդարը, չեն համապատասխանում իրականությանը, այնտեղ մարտեր են ընթանում»,- BBC-ին ասել է Ուկրաինայի Զինված ուժերի արևելյան խմբի ներկայացուցիչ Սերգեյ Չերևատին:

«Մենք մանրամասների մասին չենք խոսում, որպեսզի չբացահայտենք մեր մարտիկների մարտավարական դիրքը: Հակառակորդի ուժերը գերակշռում են, քանի որ նրանք առավելագույն ուժեր են ուղարկել այս ուղղությամբ: Բայց մեր ուժերը դեռևս կռվում են հենց քաղաքում»,- հավելել է նա:

Տաթև Ֆռանգյան