Աբսուրդ է․ Զախարովան՝ Հայաստանում ռուսական զորքերի ներկայության առաջացրած վտանգների մասին

ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում խոսելով հայ-ռուսական հարաբերությունների մասին՝ հայտարարել է, որ Հայաստանի և Ռուսաստանի ժողովուրդներին միավորում են բարեկամության սերտ կապերը, որոնք արմատներով գնում են պատմության խորքերը։

Նա նշել է, որ ՌԴ-ն մտադիր է զարգացնել հարաբերությունները ինչպես երկկողմ, այնպես էլ ընդհանուր ինտեգրացիոն  համագործակցության՝ ԵՏՄ-ի, ՀԱՊԿ-ի, ԱՊՀ-ի շրջանակում։

«Այս ֆոնին Երևանից հայտարարությունները, որ ռուսական ներկայությունը վտանգ է առաջացնում Հայաստանի անվտանգության համար, աբսուրդ են։ Տասնամյակներով մեր զինվորականները, սահմանապահները զգալի ներդրում են ունեցել Հայաստանի անվտանգության ապահովման գործում, պահպանում են նրա սահմանները։ Դա օբյեկտիվ իրականությունն է, որը հնարավոր չէ հերքել։ Ավելի վաղ Հայաստանի ներկա ղեկավարությունը հայտարարել էր, որ ՌԴ ռազմական ներկայությունը համապատասխանում է Հանրապետության ազգային շահերին։ Արկածախնդիրները, որոնք մեր զինվորականներին դուռն են ցույց տալիս, իրենց հաշիվ չեն տալիս նման քայլի իրական հետևանքների հարցում»,- ասել է Զախարովան։

Անդրադառնալով հարցին, որ Հայաստանը նպատակահարմար չի համարում իր տարածքում անցկացնել ՀԱՊԿ զորավարժությունները, ՌԴ ԱԳՆ ներկայացուցիչը պատասխանել է․ «Այս հարցում Հայաստանը գործում է այն առաջնահերթություններով, որոնք կանգնած են իր զինված ուժերի առաջ՝ հաշվի առնելով ներկա իրավիճակը։ Կցանկանայի հիշեցնել, որ նախորդ տարի ևս ՀՀ ՊՆ-ն զորքեր չի ուղարկել Ղազախստանում ՀԱՊԿ համատեղ զորավարժություններին մասնակցելու համար։ Դա իհարկե, որոշակի խնդիր է ստեղծում՝ ստիպելով փոփոխել արդեն իսկ համաձայնեցված պլանները։ Ինչպես հայտնի է՝ նման աշխատանք տարվում է, և կգտնվեն օպտիմալ որոշումներ»։

Էմմա Չոբանյան