Ինչու էին պարտադիր կուտակայինին նախկինում դեմ, հիմա՝ կողմ․ Էդմոն Մարուքյանը պարզաբանում է․ ՏԵՍԱՆՅՈՒԹ

Ազգային ժողովի «Ելք» խմբակցության պատգամավոր Էդմոն Մարուքյանը չի կիսում տեսակետը, որ երեկ Կառավարությունում բանավեճ է ծավալվել Արծվիկ Մինասյանի և վարչապետ Նիկոլ Փաշինյանի միջև․ «Նորմալ է, քննարկում էր։ Կառավարությունն ունի երկու տարբերակ՝ կա՛մ կոմիտեների նիստում կազմակերպել քննարկում, հետո գնալ բաց նիստ, կա՛մ՝ անել այն, ինչ որ տեղի ունեցավ երեկ։ Ես կարծում եմ, որ կա՛մ կոմիտեի նիստում չեն քննարկել, կա՛մ քննարկել են, բայց հարցը մինչև վերջ սպառված չի եղել»,-Ազգային ժողովում լրագրողների հետ զրույցում ասաց պատգամավորն՝ անդրադառանով պարտադիր կուտակային համակարգի վերաբերյալ Կառավարությունում տեղի ունեցած քննարկմանը։ 

Ըստ պատգամավորի՝ Կառավարությունն այժմ ունի վստահության շատ բարձր նիշ, իսկ այն, որ համակարգի վերաբերյալ կան տարակարծություններ, բնական է։

«Օրենքը կգա խորհրդարան, և կքվեարկենք այնպես, ինչպես Կառավարությունն է քննարկել»,-ասաց Էդմոն Մարուքյանը։ 

Ճշտող հարցին՝ տեղին էր արդյոք վարչապետի դիտարկումը, որ այլ կարծիք չի հանդուրժելու, պատգամավորը նկատեց, որ Կառավարությունում խոսքը եղել է թիմային պատասխանատվության մասին, իսկ հետագայում էլ նախարարները կկարողանան իրենց տեսակետները հայտնել․ «Ես չեմ կարծում, որ Մանե Թանդիլյանը կարող է ունենալ կարծիք և դա վախենալ ու չարտահայտել»,-ասաց պատգամավորը։ 

Հարցին՝ ինչու էր իր թիմն ընդդիմություն եղած ժամանակ դեմ այս համակարգին՝ պատգամավորը պատասխանեց, որ դեմ էին, քանի որ այն քաղաքական ուժը, որը ներդրել էր պարտադիր կուտակայինը, վստահություն չէր վայելում։

Մանրամասները՝ տեսանյութում։