25.11.2024 | 16:23
Երևանում տեղի է ունենալու «Ընդդեմ ցեղասպանության հանցագործության» 5-րդ գլոբալ ֆորումը
ԱՄՆ-ն Ուկրաինային RIM-7 Sea Sparrow կառավարվող հրթիռներ կտրամադրի
Քաղաքականություն
06.01.2023 | 18:04
ԱՄՆ-ն Ուկրաինային ռազմական օգնության հաջորդ փաթեթի շրջանակում Կիևին կմատակարարի ոչ միայն Bradley զրահամեքենա և Patriot զենիթային համակարգեր, որոնց տեղափոխման մասին արդեն հայտարարել է Սպիտակ տունը, այլ նաև RIM-7 Sea Sparrow («Ծովային ճնճղուկներ») կառավարվող հրթիռներ։ Այս մասին գրում է Politico-ն՝ հղում անելով սեփական աղբյուրներին, փոխանցում է DW-ի ռուսական ծառայությունը։
Sea Sparrow-ը «նավ-օդ» կառավարվող հրթիռ է` կիսաակտիվ ռադիոտեղորոշիչ գլխիկով, որը մշակվել է Raytheon Corporation-ի կողմից: Այն նախատեսված է օդային թիրախները որսալու համար։
«Ծովային ճնճղուկները» Միացյալ Նահանգների զինանոց են ընդունվել դեռևս 1976 թվականին, սակայն գրեթե կես դար անց էլ այդ հրթիռների կատարելագործված տարբերակներն օգտագործվում են ԱՄՆ ռազմածովային և ծովային կորպուսի, ինչպես նաև այլ երկրների նավատորմերի կողմից:
Politico-ի տվյալներով՝ ուկրաինացի զինվորականները կկարողանան նման հրթիռներ արձակել ոչ թե նավերից, այլ ցամաքային հարթակներից։ Պարբերականի աղբյուրները պարզաբանել են, որ Sea Sparrow-ի արձակման համար հնարավոր է եղել հարմարեցնել դեռևս խորհրդային տարիներին մշակված Buk համալիրների արձակման սարքավորումները։
ԱՄՆ ռազմածովային ուժերը չեն հրապարակայնացրել Sea Sparrow-ի հեռահարության ու արագության մասին տեղեկությունները, սակայն փորձագետները նշում են, որ հրթիռի նոր տարբերակները կարող են հասնել ձայնի արագությունը չորս անգամ գերազանցող արագության, և խոցել ինքնաթիռներն ու թևավոր հրթիռները մինչև 50 կմ հեռավորության վրա:
