04.06.2026 | 10:20
Խուզարկություններ՝ 50-ից ավելի հասցեներում
Միրզոյանի հետ ՌԴ-ում Ադրբեջանի պայմաններով էին խոսելու՝ ճիշտ էր չգնալը․ Մոսկվան լեգիտիմացրել է Բաքվի պահանջը․ Արմինե Մարգարյան․ ՏԵՍԱՆՅՈՒԹ
Քաղաքականություն
23.12.2022 | 20:32
Այսօր Մոսկվայում հանդիպել են ՌԴ-ի և Ադրբեջանի ԱԳ նախարարներ Լավրովն ու Բայրամովը։ Ըստ երևույթին, նրանց պիտի միանար նաև հայաստանցի պաշտոնակից ՀՀ ԱԳ նախարար Արարատ Միրզոյանը։ Սակայն ՀՀ ԱԳՆ-ն տեղեկացրել է, որ նախարար Միրզոյանի առաջնահերթությունը հիմա Լաչինի միջանցքի վերագործարկումն ու Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է, ինչից ելնելով՝ հայկական կողմը խնդրել է հետաձգել Մոսկվայում նախատեսված հանդիպումը։ Լավրովը ցավ է ապրել Միրզոյանի այս որոշման համար, ակնարկել է, որ շանս է բաց թողնվել ՌԴ չգնալով։ Նաև ՀՀ-ում քննադատություն հնչեց Արարատ Միրզոյանի հասցեին, որ ինչքան էլ ծանր լիներ դրությունը, պետք էր գնալ և բանակցել ռուս և ադրբեջանցի պաշտոնակիցների հետ։
Ռազմաքաղաքական հարցերով փորձագետ Արմինե Մարգարյանը Factor TV-ի հարցազրույցում ասում է, որ ճիշտ էր Միրզոյանի՝ Մոսկվա չգնալը․
«Իսկ ի՞նչ եք կարծում, մինչև իր գնալը, երբ ՄԱԿ ԱԽ նիստ էր տեղի ունենում, այդ ընթացքում քանի՞ անգամ պիտի հեռախոսազրույց տեղի ունեցած լինի Միրզոյանի և Լավրովի մակարդակով, որոնց մասին մենք չգիտենք։ Կարծում եմ՝ անթիվ-անհամար հեռախոսազանգեր, որտեղ և ռուսները պետք է մեզ վախեցնեին, պետք է ցույց տային այն ճանապարհը, թե մենք ուր ենք գնում, ցույց տային, թե մենք ինչ խնդիրներ կարող ենք ունենալ, և դա կարող է ասվել տարբեր հռետորաբանությամբ։ Այսինքն՝ ի՞նչ պետք է ասվեր Մոսկվայում, որ չի ասվել մինչև Մոսկվան։ Կարծում եմ՝ որևէ բան չի ասվել, որ կբխեր հայկական կողմի շահերից։ Հետևաբար, գնալ այս պայմաններում և խոսել եռակողմ մակարդակով, կնշանակեր՝ դրանք միակ պայմաններն են, որ պիտի ընդունի Հայաստանը։ Իսկ մենք նման շռայլություն չենք կարող թույլ տալ մեզ։ Եվ չենք կարող լեգիտիմացնել այն խոսույթը, որ հիմա ձևավորում են Ադրբեջանը և Ռուսաստանը»։
Հարցազրույցն ամբողջությամբ՝ տեսանյութում։
Ռոբերտ Անանյան
