20.02.2026 | 13:40
Աշխարհի գավաթ․ Հայ մարմնամարզիկները դուրս են եկել եզրափակիչ
Լաչինը 11 օր է՝ փակ է․ Փաշինյանն ուղիղ քննադատեց նաև ՌԴ-ին․ ՏԵՍԱՆՅՈւԹ
Քաղաքականություն
22.12.2022 | 20:25
Ադրբեջանի կողմից Լաչինի միջանցքի ապօրինի շրջափակման հետևանքով Լեռնային Ղարաբաղում հումանիտար իրադրությունը մնում է ծայրահեղ լարված: Նկատվում է առաջին անհրաժեշտության մի շարք ապրանքների, այդ թվում՝ պարենի դեֆիցիտ․ այսօր Կառավարության նիստում հայտարարեց Հայաստանի վարչապետ Նիկոլ Փաշինյանը՝ ընդգծելով, որ հարյուրավոր ընտանիքներ շարունակում են բաժանված մնալ՝ ակամայից հայտնվելով շրջափակման տարբեր կողմերում: Նա հերթական անգամ շեշտեց՝ Ադրբեջանը խախտում է նոյեմբերի 9-ի եռակողմ հայտարարության դրույթները։
Փաշինյանի ուղիղ մեղադրանքին, որ նոյեբերի 9-ի հայտարարությամբ ստանձնած պարտավորությունները չի կատարում նաև խաղաղապահ զորախումբը, արդեն արձագանքել են Ռուսաստանի ԱԳ նախարարությունից։ Եվ չնայած նրան, որ արդեն 11 օր է՝ ռուս խաղաղապահների վերահսկողության տակ գտնվող Լաչինի միջանցքը փակ է, կառույցի պաշտոնական ներկայացուցիչ Մարիա Զախարովան պնդում է, թե իրենց առաքելությունը ռուս խաղաղապահները, մեջբերում եմ՝ «լավ են կատարում»։
Ինչո՞ւ Ռուսաստանը չի կատարում նոյեմբերի 9-ի հայտարարությամբ ստանձնած պարտավորությունները․ ՀՀ Անվտանգության խորհրդի քարտուղար Արմեն Գրիգորյանն ասում է՝ իշխանությունը հարցը թե՛ հրապարակային, թե՛ ոչ հրապարակային բարձրացրել է։
Նիկոլ Փաշինյանը Կառավարության այսօրվա նիստում նաև շեշտեց՝ Լեռնային Ղարաբաղի հիմնախնդրի կարգավորման գործում միջազգային հանրության ակտիվությունը պետք է էականորեն մեծանա: Իշխանության հայտարարություններին ի պատասխան, թե Լաչինի միջանցքի անխոչընդոտ գործելու երաշխավորը Ռուսաստանն է, ԱԺ «Պատիվ ունեմ խմբակցության պատգամավոր Տիգրան Աբրահամյանը հիշեցնում է՝ 2020 թվականի նոյեմբերի 9-ի հայտարարության տակ ստորագրել է նաև Հայաստանը։
Նիկոլ Փաշինյանն այսօր նաև տեղեկացրեց՝ Ադրբեջանին են փոխանցել խաղաղության պայմանագրի իրենց առաջարկները և սպասում են արձագանքին։ Ավելի ուշ Անվտանգության խորհրդի քարտուղարը հավելեց՝ եթե Բաքվի համար Երևանի առաջարկներն ընդունելի լինեն, ապա պայմանագրի ստորագրումը մինչև տարեվերջ հնարավոր կլինի։
Այսօր նաև հայտնի դարձավ, որ հայկական կողմը խնդրել է հետաձգել վաղը Մոսկվայում նախատեսվող Հայաստանի, Ռուսաստանի և Ադրբեջանի արտաքին գործերի նախարարների հանդիպումը, քանի որ այս պահին Հայաստանի ԱԳ նախարարի առաջնահերթությունը Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի հետևանքով ստեղծված խնդիրների հասցեագրումն է:
Մանրամասները՝ տեսանյութում։
Շողիկ Գալստյան
