Ինչ է ենթադրում ՄԻԵԴ որոշումը․ մանրամասնում է Եղիշե Կիրակոսյանը. ՏԵՍԱՆՅՈՒԹ

ՄԻԵԴ-ը փաստացի բավարարել է Հայաստանի խնդրանքը։ Այս մասին այսօր հրավիրված ասուլիսում նշեց Միջազգային իրավական հարցերով ՀՀ ներկայացուցիչ Եղիշե Կիրակոսյանը՝ անդրադառնալով նախօրեին ՄԻԵԴ-ի կայացրած որոշմանը, որով ՄԻԵԴ-ը միջանկյալ միջոցներ է կիրառել Ադրբեջանի նկատմամբ:

«Մենք հնարավոր մաքսիմալ պահանջ էինք դրել ՄԻԵԴ-ի առջև՝ ապաշրջակել, սակայն դատարանն ունի որոշակի սահմանափակվածություններ․ դատարանն ունի հստակ շրջանակներ իրավական տեսանկյունից այսպիսի միջոցներ կիրառելիս։

Մեր դիմումի մեջ շեշտադրումներ արվել էին հատկապես առողջական խնդիրներ ունեցող անձանց, ինչպես նաև անօթևան մնացած և կոնվենցիայի 2-րդ և 3-րդ հոդվածների տրամաբանության տակ: Երկրորդ հոդվածը կյանքի իրավունքն է, երրորդ հոդվածը դաժան, անմարդկային վերաբերմունքի արգելքի նորմն է: ՄԻԵԴ-ը այս իրավիճակը պետք է կապի այդ երկու իրավունքների հետ, բացառիկ դեպքերում նաև մասնավոր կյանքի անձեռնմխելիության մասին կարող է խոսք լինել, որը 8-րդ հոդվածն է: Դատարանը պետք է այդ կապը տեսնի, որ իրավիճակն այնպիսին է, որ շարունակվելը կարող է անդառնալի վնաս հասցնի այս երկու հոդվածներով պաշտպանվող արժեքներին․․․»,- նշեց Կիրակոսյանը։

Նա նաև կարևորեց այն, որ դատարանը հղում է կատարել նոյեմբերի 9-ի եռակողմ հայտարարությանը, որով Ադրբեջանը ստանձնել էր պարտավորություն երաշխավորել Լաչինի միջանցքով մարդկանց ու բեռների անվտանգ տեղափոխումը:

Եղիշե Կիրակոսյանը, մանրամասնելով, թե ինչ է ենթադրում ՄԻԵԴ որոշումը, նշեց․ «Սա նշանակում է, որ Ադրբեջանը պարտավորվում է ապահովել անվտանգ տեղաշարժն առաջին հերթին առողջական խնդիրներ ունեցող, երկրորդ հերթին այն մարդկանց համար, որոնք մնացել են ճանապարհին՝ առանց օթևանի, առանց ապրուստի, այսինքն՝ արցախում են մնացել կամ Հայաստանից Արցախ ճանապարհին»։