Տնտեսություն
11.06.2018 | 12:16
Այսօր՝ վաղ առավոտից, Լոռու մարզի Շնող և Թեղուտ համայնքների բնակիչները կրկին վերսկսել են բողոքի ակցիան, որը դադարեցրել էին 10 օր առաջ։
Համայնքի բնակիչները պահանջում են «Թեղուտ» ՓԲԸ-ի ղեկավարությունից աշխատանքի ընդունել իրենց, քանի որ 10 տարի առաջ այդ ընկերության համար գերակա շահ են ճանաչվել իրենց պատկանող հողերը, դրա դիմաց վճարվել է չնչին գումար՝ փոխարենը համայնքի բնակիչներին վստահեցրել են, որ «Թեղուտ» ՓԲԸ-ում կունենան մշտական աշխատանք։
Factor.am-ի հետ զրույցում Շնող համայնքի ավագանու անդամ Արտակ Բայրամյանը նշեց, որ համայնքի ղեկավարն այսօր հանդիպել է բողոքի ակցիա անող բնակիչների հետ, փորձել են երկխոսել և խնդրի լուծման ինչ-որ ուղիներ գտնել:
«Համայնքի բնակիչներից տարիներ առաջ իրենց հողերը վերցրել են, մարդկանց հողերը ճանաչել են գերակա շահ ու վճարել չնչին կոպեկներ, վստահեցրել, որ կունենան աշխատանք, սակայն նրանց հիմա ազատել են աշխատանքից, և հանքում աշխատում են մարզի այլ համայնքի աշխատակիցներ, բայց չէ՞ որ մեր համայնքի բնակիչների հողերն են վերցրել՝ նրանց զրկելով այդ հողերը մշակելու և իրենց սոցիալական խնդիրները լուծելու հնարավորությունից։ Մարդիկ վերցրել են նաև վարկեր և հիմա կանգնած են շատ ծանր խնդրի առաջ, ուստի, թեև այսօր համայնքի ղեկավարը հանդիպել է նրանց հետ, սակայն բնակիչները անդրդվելի են և պայքարը շարունակելու են։ Նրանց վերջին հույսը ճանապարհ փակելն է, փորձելու են այդ եղանակով պաշտոնյաների ուշադրությունը սևեռել իրենց խնդրի վրա»,- ասաց ավագանու անդամը։
Հարցին՝ խնդրին արձագանքե՞լ են Կառավարությունից և մարզպետարանից, Արտակ Բայրամյանը պատասխանեց․ «Մինչ այս պահը մարզպետարանից որևէ արձագանք չենք ստացել, իսկ ինչ վերաբերում է Կառավարությանը, ապա համայնքի բնակիչներն այդ հարցով անպայման կդիմեն նաև նրանց»։
Արտակ Բայրամյանը նաև նկատեց, որ «Թեղուտ» ՓԲԸ-ից բողոքի ակցիա իրականացնող քաղաքացիների բարձրացրած խնդիրներին ևս չեն արձագանքել, միայն նշել են, որ Թեղուտ և Շնող համայնքի բնակիչների փոխարեն այլ համայնքներից են աշխատողներ պահում, քանի որ նրանք ունեն մասնագիտական որակավորում։
