Շուշին դժգույն քաղաք չէ, դժգույնը դուք եք. այո՛, ապագա կա, բայց առանց ձեզ. Էռնեստ Ավանեսով․ ՏԵՍԱՆՅՈՒԹ

«Էս ծուռ, շատերիդ ծռած երկրում, ուզում եմ հասկանալ՝ դեռ ի՞նչ պետք է լինի, որ սթափվենք»,- Երևանի ավագանու արտահերթ նիստի ընթացքում ասաց ավագանու անկախ անդամ Էռնեստ Ավանեսովը:

«Շատ հարցեր են առաջանում մարդկանց մոտ․․․ Օրինակ՝ ինչո՞ւ չենք գնում Լաչինի միջանցք ու այնտեղ նկարվում, սելֆիներ անում կամ լենտեր կտրում․․․ Հասկանում եմ՝ այնտեղ վտանգավոր է․․․»,- նշեց Ավանեսովը և գործընկերներին հարցրեց՝ պատկերացնո՞ւմ եք այս պահին Ստեփանակերտում հիվանդանոցի վերակենդանացման բաժնում գտնվող 4 ամսական երեխայի հարազատների վիճակը:

«Մինչ այս լսարանում ձեզանից շատերն իրենց հետևից փողկապներ են քարշ տալիս, շատ մարդիկ վստահաբար հիշում են 1990-ականների մութ ու ցուրտ տարիները, երբ չեկով հաց էին գնում, վառելիք ստանում: Արցախում հիմա այդ վիճակն է: Արցախը կանգնած է հումանիտար ճգնաժամի առջև:
2015թ. ցուցերը ցրելու համար ջրցան էին բանեցնում մեզ վրա: Հասկանում եմ, եկել, ասում ենք՝ ջրցանով էլ ցույց չենք ցրելու, բայց ինձ թվում է՝ Լաչինում դրա կարիքը հիմա կա»,- նշեց ավագանու անդամը՝ հավելելով, որ ոչ մի արտաքին գործընկերոջ կոչ չի անում, իր կոչը Հայաստանի և Արցախի հանրապետությունների իշխանություններին է ուղղված, որ ամեն ինչ անեն՝ ճանապարհը բացելու համար, որովհետև Արցախը Հայաստան է:

«Շուշին դժգույն քաղաք չէ, դժգույնը դուք եք. այո՛, իսկապես ապագա կա, բայց առանց ձեզ»,- ընդգծեց Էռնեստ Ավանեսովը՝ դիմելով իշխանությանը։

Մանրամասները՝ տեսանյութում։