Ադրբեջանի նոր հարվածն ավելի ուժեղ կլինի, նորից՝ Արցախի ուղղությամբ․ ՀՀ-ն պիտի շատ արագ գործի․ ՏԵՍԱՆՅՈւԹ

Ադրբեջանի՝ Լաչինի միջանցքում վերջին սադրանքին ի պատասխան՝ ՀՀ ԱԳՆ-ն իր հայտարարությունում ընդգծել էր Լեռնային Ղարաբաղի հայության իրավունքների և անվտանգության ապահովման միջազգային մեխանիզմների գործարկման կամ վերագործարկման անհրաժեշտությունը և պնդել, որ այս նպատակով առաջիկայում խորհրդակցություններ կսկսի միջազգային գործընկերների հետ։ Կարելի է ենթադրել, որ նկատի ունեն նոր խաղաղապահների տեղակայման հավանական սցենար։

Factor TV-ի հարցազրույցում ռազմաքաղաքական հարցերով փորձագետ Արմինե Մարգարյանից հետաքրքրվեցինք՝ հաշվի առնելով այն, որ ՀՀ իշխանությունը երբեմն հայտարարում է գաղափարներ, որոնք հետո չի կատարում, կարելի՞ է սպասել, որ նրանք իրապես գործի կգցեն վերոնշյալ մեխանիզմների ստեղծման պրոցես։ Փորձագետը հիշեցրեց 2021-ին մայիսյան ագրեսիայի ժամանակ ՀՀ վարչապետի խոսքը, որով կոչ էր արել ԵԱՀԿ-ին, ՀԱՊԿ-ին և տարբեր միջազգային կառույցներին, որ դատապարտեն Ադրբեջանի ռազմական ագրեսիան․ «Եվ ի՞նչ արվեց․ ունենալով հստակ ադրբեջանական ագրեսիա, որը տեղավորվում էր ՀԱՊԿ-ի կանոնադրության չորրորդ հոդվածի տակ, ՀՀ-ն այդ կառույցին դիմեց չորրորդ հոդվածով։ Այդ պատճառով՝ արձագանք չեղավ այն ժամանակ, ինչպես՝ հիմա, երբ արդեն դիմել էինք չորրորդ հոդվածով։ Այն ժամանակ մենք չդիմեցինք նաև ՄԱԿ ԱԽ, ինչո՞ւ, որովհետև կարծիք էր պտտվում, որ չկա հաջողելու վստահություն, պիտի հաշվարկներ արվեն և այլն։ Դրանից հետո եղավ սեպտեմբերի ագրեսիան, և փաստացի՝ 2021-ի մայիսից մինչև 2022-ի սեպտեմբեր ընկած ժամանակահատվածը մենք կորցրեցինք։ Եթե մենք դիմեինք ՀԱՊԿ-ին չորրորդ հոդվածով, շատ ավելի արագ ի ցույց կդնեինք ՀԱՊԿ-ի պաշտոնական դիրքորոշումը հանրությանը։ Դա թույլ կտար մի փոքր այլ ռազմատեխնիկական ճանապարհներով գնալ։

Սա կորսված ժամանակահատված էր։ Եղավ սեպտեմբերի ագրեսիան, դիմեցինք արդեն չորրորդ հոդվածով, կարծես՝ ՀԱՊԿ-ին մարտահրավեր էր նետվում, ինչը կարելի էր ավելի վաղ անել»։ Արմինե Մարգարյանին ներկա ժամանակահատվածը հիշեցնում է նախորդ՝ կորսված ժամանակաշրջանը, երբ կարծես ՀՀ-ն պատրաստում է աշխարհին, մեզ և ՌԴ-ին, որ պետք է գործի․ «Գիտեք, մենք չունենք երաշխիք, որ երբ Ադրբեջանը հաջորդ անգամ մեզ հարվածի, իսկ դա լինելու է արցախյան ուղղությամբ․․․ շատ ավելի ուժեղ է լինելու Ադրբեջանի հաջորդ հարվածը, մենք չունենք երաշխիք, որ աշխարհաքաղաքական զարգացումները կլինեն մեր օգտին։ Մենք պիտի արագ գործենք․ իրավունք չունենք մեզ համար 100 տոկոսանոց երաշխիքներ ստեղծելու ճանապարհով գնալ, որևէ բան չենք կարող անել ապահովագրված»,- նշեց ռազմաքաղաքական հարցերով փորձագետ Արմինե Մարգարյանը։

Հարցազրույցն ամբողջությամբ՝ տեսանյութում։

Ռոբերտ Անանյան