30.10.2026 | 10:36
Լոռու մարզում փրկարարները դժվարամատչելի տարածքից իջեցրել են քաղաքացուն
Լեռնային Ղարաբաղում հումանիտար օդային միջանցքի հրատապ բացման անհրաժեշտություն կա․ Ռուբեն Վարդանյան
Քաղաքականություն
15.12.2022 | 11:55
Արցախի պետնախարար Ռուբեն Վարդանյանը հայտարարել է Լեռնային Ղարաբաղում հումանիտար օդային միջանցքի հրատապ բացման անհրաժեշտության մասին։ «Կոմերսանտ»-ին տված հարցազրույցում ԼՂ պետնախարարն ասել է․ «Մենք կառուցում ենք մի համակարգ, որը պետք է բնակչությանը ամբողջական շրջափակման պայմաններում անհրաժեշտ ամեն ինչով ապահովի։ Օդանավակայանը պետք է գործարկվի։ Դրա համար անհրաժեշտ է միջազգային կառույցների և բոլոր երկրների ճնշումը, որպեսզի մարդասիրական միջանցք հայտնվի, և մարդասիրական բեռներով ինքնաթիռները կարողանան վայրէջք կատարել Ստեփանակերտի օդանավակայանում։ Սա Ադրբեջանից կախված չլինելու միակ միջոցն է, սա մեզ համար որպես համայնք այստեղ մնալու կարևոր պայման է, որպեսզի նման իրավիճակները չկրկնվեն: Օդանավակայանը լիովին պատրաստ է գործել»,- հայտարարել է Վարդանյանը։
Մեկնաբանելով ներկա և այլ ճգնաժամերը հաղթահարելու նպատակով Բաքվի հետ հնարավոր փոխգործակցությունը՝ Վարդանյանն ասել է․
«Ադրբեջանը պետք է հասկանա, որ անհրաժեշտ է Արցախը որպես բանակցությունների կողմ ճանաչել։ Եվ այդ ժամանակ ամեն ինչ կարելի է քննարկել։ Այստեղ մարդկանց ամբոխ չի ապրում, սա երկիր է, սա պետություն է։ Կան ինստիտուտներ՝ խորհրդարան, կառավարություն, նախագահ, հասարակական կազմակերպություններ։ Անհրաժեշտ է նստել ու բանակցություններ վարել, այլ տարբերակ չկա»,- հայտարարել է Արցախի պետնախարարը։
Տաթև Ֆռանգյան
