20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Մավրիտանիայի նորանշանակ դեսպանն իր հավատարմագրերի պատճենն է հանձնել ՀՀ ԱԳ նախարարի տեղակալին
Քաղաքականություն
13.12.2022 | 21:22
Դեկտեմբերի 13-ին ԱԳ նախարարի տեղակալ Մնացական Սաֆարյանին իր հավատարմագրերի պատճենն է հանձնել Հայաստանի Հանրապետությունում Մավրիտանիայի Իսլամական Հանրապետության նորանշանակ դեսպան Մոհամեդ Մահմուդ Դահին (նստավայրը՝ Մոսկվա): Այս մասին հայտնում են ՀՀ ԱԳՆ-ից։
Ողջունելով Հայաստանում դեսպան հավատարմագրելու Մավրիտանիայի կառավարության որոշումը՝ ԱԳ նախարարի տեղակալը շնորհավորել է դեսպան Դահիին նշանակման առթիվ և հաջողություն մաղթել նրան կարևոր առաքելության իրականացման գործում։ Իր հերթին, շնորհակալություն հայտնելով բարեմաղթանքների համար, դեսպանը հայտնել է իր հանձնառությունը գործադրելու բոլոր ջանքերը Հայաստանի և Մավրիտանիայի միջև փոխադարձ հետաքրքրություն ներկայացնող տարբեր ոլորտներում կապերի և համագործակցության հաստատման և ընդլայնման ուղղությամբ։
Զրուցակիցները քննարկել են կրթության, գիտության, մշակույթի, ինչպես նաև տնտեսական տարբեր ճյուղերում փոխշահավետ համագործակցության հաստատման հեռանկարները։ Այս տեսանկյունից կարևորվել են երկկողմ իրավապայմանագրային դաշտի ընդլայնումը, փոխայցելությունների և հանդիպումների իրականացումը։ Անդրադարձ է կատարվել միջազգային կազմակերպությունների (ՄԱԿ, ՖՄԿ և այլն) շրջանակներում համագործակցության դրական փորձին և շեշտվել է դրա շարունակականության անհրաժեշտությունը։
Անդրադարձ է կատարվել նաև տարածաշրջանային և միջազգային օրակարգի մի շարք խնդիրների: Այս համատեքստում Մնացական Սաֆարյանը դեսպան Դահիին է ներկայացրել սեպտեմբերի 13-ին Ադրբեջանի կողմից Հայաստանի ինքնիշխան տարածքի նկատմամբ սանձազերծված լայնածավալ ագրեսիայի հետևանքները, ինչպես նաև՝ Հայաստան-Ադրբեջան հարաբերությունների և Լեռնային Ղարաբաղի հակամարտության կարգավորման գործընթացների վերաբերյալ հայկական կողմի դիրքորոշումները։
