Եթե ուզում են մեկին սուր ձևով խոցել, ասում են՝ թուրք ես․ Փաշինյանը կարևորեց ատելության խոսքի բացառումը․ ՏԵՍԱՆՅՈՒԹ

«Ցեղասպանության կանխարգելման գլխավոր գործիքը երկխոսությունն է և համագործակցությունը, այդ թվում՝ Բաքվի եւ Ստեփանակերտի միջև»,- այս մասին ընդգծեց ՀՀ վարչապետ Նիկոլ Փաշինյանը, ելույթ ունենալով «Ընդդեմ ցեղասպանության հանցագործության» գլոբալ ֆորումում։

Թե ինչ պետք է անել ցեղասպանությունների կանխարգելման համար, Փաշինյանն ընդգծեց, որ պետք է փոխել տարածաշրջանային հարաբերությունների բովանդակությունը․ «Դա պետք է սկսել ամենապարզ բաներից՝ տարածաշրջանում ատելության խոսքի կանխարգելումից, կառավարումից և բացառումից հատկապես պաշտոնական մակարդակում»։

«Իսկապես մեր տարածաշրջանում նաև թշնամությունը պետք է կառավարվի, և դա պետք է սկսել ատելության խոսքի կառավարումից, որը գոյություն ունի մեր՝ առնվազն Հայաստան-Թուրքիա, Հայաստան-Ադրբեջան հարաբերություններում», – նշեց Փաշինյանը։

Վարչապետի խոսքով՝ Հայաստանում պետք է  դադարեցնել մարդկանց, այդ թվում՝ քաղաքական մրցակիցներին կամ հակառակորդներին վիրավորելու համար օգտագործել ուրիշ ազգի անուն:

«Հայաստանում կա այդ բանը, օրինակ, եթե ուզում են որևէ մեկին  ամենասուր ձևով խոցել, շատ պարզ ձև կա դրա համար՝ ասել՝ «դու թուրք ես»: Մի մարդ, որը ձեզ հայտնի հանգամանքների բերումով բավականին շատ արժանացել է այդ հասցեագրմանը. ես ինձ վիրավորելու միտում  ունեցող մարդկանց ուզում եմ ասել, որ դրանով իրենք ինձ չեն վիրավորում, որովհետև ես դա վիրավորանք չեմ ընդունում ու ընկալում։

Եվ ընդհարապես այս իրողությունների հետ մենք պետք է առերեսվենք և պետք է աշխատենք փոխել այս իրողությունները։ Պաշտոնական մակարդակում պետք է ասենք, որ չենք ուզում, որ որևէ ազգի անուն օգտագործվի որպես վիրավորանք, և սրանք ցեղասպանության կանխարգելման կարևորագույն գործիքներ են», – նշեց վարչապետը։

Մանրամասները՝ տեսանյութում։