29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Թուրքիան ցանկանում է ՌԴ-ից գազի գնի 25% զեղչ ստանալ․ Bloomberg
Քաղաքականություն
08.12.2022 | 22:45
Թուրքիան Ռուսաստանի հետ քննարկելու է գազի գնի զեղչի հարցը, որը կարող է կազմել ավելի քան 25 տոկոս։ Այս մասին գրում է Bloomberg-ը, որին վկայակոչում է Forbes.ru-ն։
Նշվում է, որ այս զեղչը կօգնի Էրդողանին ընտրություններից առաջ զսպել բարձր գնաճը և խուսափել կոմունալ ծառայությունների ավելի բարձր վճարներից։ Դեկտեմբերի 9-ին Անկարայում ռուսական պատվիրակության հետ տեղի կունենան գազի գնի զեղչման հարցով բանակցությունները, որը կարող է 25 տոկոսից ավելի լինել, Bloomberg-ին հայտնել են թուրք բարձրաստիճան պաշտոնյաները։
Թուրքիան ցանկանում է, որ զեղչը կիրառվի ոչ միայն 2023 թվականի ապագա վճարումների, այլ նաև 2022 թվականին արդեն իրականացված որոշ գործարքների համար։ Եթե Թուրքիան չկարողանա պայմանավորվել զեղչի շուրջ ցանկալի մակարդակով, ապա խնդրելու է հետաձգել վճարումները մինչև 2024 թվականը։ Այս մասին ասել են գործակալության աղբյուրները։
Թուրքիայի կառավարությունը և Botas գազային պետական ընկերությունը չեն պատասխանել Bloomberg-ի հարցումներին։
Ռուսաստանի հետ գործարքը կօգնի թուլացնել ճնշումը թուրքական լիրայի վրա, որը հակված է բարձր գնաճի, իսկ Թուրքիայի նախագահ Ռեջեփ Թայիփ Էրդողանին՝ խուսափել էլեկտրաէներգիայի և գազի բարձր գներից և դրանով իսկ բարձրացնել իր ժողովրդականությունը 2023 թվականի ընտրություններից առաջ։
Հավելենք նաև, որ հոկտեմբերի 13-ին Աստանայում տեղի է ունեցել Թուրքիայի նախագահ Ռեջեփ Թայիփ Էրդողանի ու ՌԴ նախագահ Վլադիմիր Պուտինի հանդիպումը, որի ընթացքում ռուսական կողմն Անկարային առաջարկել էր գազային հանգույց ստեղծել Եվրոպա մատակարարումների համար։ Աստանայից վերադառնալիս էլ լրագրողների հետ զրույցում Էրդողանն ասել էր, որ Թուրքիայի Էներգետիկայի և բնական պաշարների նախարարությանը և ռուսական կողմից համապատասխան գերատեսչություններին հանձնարարվել է համատեղ քայլեր մշակել այդ ուղղությամբ։ Նա նաև նշել էր, որ Թրակիայի շրջանը կարող է դառնալ նոր գազային հանգույցի ստեղծման ամենահարմար վայրը։
Էմմա Չոբանյան
