16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
«Հայհոյել են, ուժ գործադրել, պատռել Վարուժան Ավետիսյանի նկարները». ԱԺԲ երթից 96 անձ է բերման ենթարկվել․ ՏԵՍԱՆՅՈւԹ
Քաղաքականություն
07.12.2022 | 19:15
Վարուժան Ավետիսյանին քաղաքացիական հիվանդանոց տեղափոխելու պահանջով երեկ ԱԺԲ-ն հերթական նստացույցն էր իրականացնում։ Նստացույցին հաջորդեց նախապես հայտարարված խաղաղ երթը․ այն, սակայն, ընդհատվեց Ոստիկանության միջամտությամբ։ Ակցիայի մասնակիցներին շրջափակման մեջ վերցրած իրավապահներն ուժի գործադրմամբ Ազգային-ժողովրդավարական բևեռի կազմակերպած հավաքի 96 մասնակցի բերման ենթարկեցին Ոստիկանության տարբեր բաժիններ:
Ոստիկանությունից, սակայն, չեն մեկնաբանում բերման ենթարկվածների նկատմամբ ուժի կիրառման փաստը: Factor TV-ի հետ զրույցում Ոստիկանության լրատվության վարչության պետի տեղակալ Էդգար Ջանոյանը նշեց, որ ակցիայի մասնակիցները բերման են ենթարկվել Վարչական իրավախախտումների վերաբերյալ օրենսգրքի 182-րդ հոդվածի՝ ոստիկանի օրինական պահանջները չկատարելու համար: ԱԺԲ-ից, սակայն, հերքում են ոստիկանի կողմից պահանջ չկատարելու հիմնավորումը՝ շեշտելով՝ Ոստիկանության կողմից բռնի գործողություններն առաջին անգամ չէին:
Ազգային-ժողովրդավարական բևեռի անդամները և Վարուժան Ավետիսյանի համակիրներն արդեն օրեր շարունակ նստացույց և երթեր են իրականացնում՝ Ավետիսյանին պատշաճ բուժօգնություն տրամադրելու պահանջով։ Ըստ նրանց՝ ԱԺԲ փոխնախագահին շտապ պետք է «Նուբարաշեն» ՔԿՀ-ից տեղափոխել քաղաքացիական հիվանդանոց։ Արդարադատության նախարարությունը, սակայն, հերքում է դրա անհրաժեշտությունը՝ շեշտելով, որ դեռևս նոյեմբերի 24-ին Ավետիսյանը տեղափոխվել է իր կողմից ընտրված «Էրեբունի» ԲԿ և հետազոտություններ անցել։
««Էրեբունի» ԲԿ-ում կատարված հետազոտությունների և խորհրդատվությունների արդյունքում բժիշկ-մասնագետների կողմից բուժման, մասնավորապես, ստացիոնար բուժման կարիք չի արձանագրվել։ Նույն օրը Վարուժան Ավետիսյանին դուրս են գրել «Էրեբունի» բժշկական կենտրոնից և տեղափոխել ՀՀ ԱՆ «Նուբարաշեն» քրեակատարողական հիմնարկ։ Ներկա պահին Վարուժան Ավետիսյանի առողջական վիճակը բավարար է: Ավելի վաղ նա ենթարկվել էր զննության՝ «Քրեակատարողական բժշկության կենտրոն» ՊՈԱԿ-ի «Նուբարաշեն» ստորաբաժանման բժշկական անձնակազմի կողմից, իսկ մի շարք լրահետազոտությունների արդյունքներով՝ ախտաբանական փոփոխություններ չեն արձանագրվել»,- նշվում է ԱՆ հաղորդագրության մեջ։
ԱԺԲ-ի ակտիվիստներն այսօր ևս Վարուժան Ավետիսյանին քաղաքացիական հիվանդանոց տեղափոխելու պահանջով նստացույց անցկացրեց Հյուսիսային պողոտայում։
Մանրամասները՝ տեսանյութում։
Ռոզա Վարդանյան
