30.10.2026 | 10:45
Ուկրաինական ԱԹՍ-ների գրոհի հետևանքով Սամարայի մարզի նավթավերամշակման գործարանում հրդեհ է բռնկվել
Հուլուսի Աքարը հայտարարել է, որ Թուրքիայի կամ Ադրբեջանի դեմ ուղղված ցանկացած սպառնալիք կամ սադրանք «ընդհանուր մարտահրավեր է համարվելու»
Քաղաքականություն
06.12.2022 | 20:42
Թուրքիայի կամ Ադրբեջանի դեմ ուղղված ցանկացած սպառնալիք կամ սադրանք՝ անկախ դրա աղբյուրից, կճանաչվի որպես ընդհանուր մարտահրավեր եղբայրական երկրների ճանապարհին։ Այս մասին հայտարարել է Թուրքիայի ազգային պաշտպանության նախարար Հուլուսի Աքարը՝ Բաքվի մերձակայքում գտնվող Պերեքիշկուլ զորավարժարանում «Եղբայրական բռունցք» թուրք-ադրբեջանական համատեղ զորավարժությունների մասնակիցներին դիմելով, գրում է Անադոլու գործակալությունը:
Նրա խոսքով՝ Անկարան և Բաքուն «ընդհանուր են համարում և՛ բարեկամներին, և՛ թշնամիներին»։ Սրանում թող ոչ ոք չկասկածի, ընդգծել է թուրք նախարարը, որն Ադրբեջանում է Թուրքիայի Զինված ուժերի ԳՇ պետի և ԶՈՒ հրամանատարների ուղեկցությամբ։
Հուլուսի Աքարն Ադրբեջանը Թուրքիայի համար հարազատ և եղբայրական երկիր է անվանել։
«Համաշխարհային հանրությունն ականատես եղավ մեր միասնությանը 44-օրյա պատերազմի ընթացքում»,- ընդգծել է թուրք նախարարը։
Նա կոչ է արել «փակել տարածաշրջանում առկա հակասությունների և ատելության էջն ու սկսել կառուցել ընդհանուր ապագա՝ հիմնված միջազգային իրավունքի նորմերի հարգման վրա»։ Աքարը բարձր է գնահատել Թուրքիայի և Ադրբեջանի ղեկավարների դիրքորոշումը, որոնց «հայտարարությունները բազմիցս հնչեցրել են հստակ ուղերձ տարածաշրջանում խաղաղության, կայունության և զարգացման համար»։
«Մենք անկեղծորեն հույս ունենք, որ Հայաստանն անպատասխան չի թողնի Թուրքիայի և Ադրբեջանի խաղաղության ձեռքը»,- հայտարարել է Աքարը։
Թուրք նախարարը մատնանշել է Հարավային Կովկասում տարածաշրջանային հաղորդակցությունների, այդ թվում, այսպես կոչված, «Զանգեզուրի միջանցքի» բացման կարևորությունը։
Տաթև Ֆռանգյան
