«Դասարվեստ» կրթամշակութային ծրագրի շրջանակում բարձրարվեստ ստեղծագործություններ են ցուցադրվել ՀՀ մարզերում և համայնքներում

ՀՀ ԿԳՄՍ նախարարության աջակցությամբ Հայաստանի ազգային պատկերասրահը 2022 թվականի մայիս-հոկտեմբեր ամիսներին իրականացրել է «Դասարվեստ» կրթամշակութային ծրագիրը:

Ծրագրի շրջանակում ՀՀ 10 մարզերի դպրոցներում աշակերտներին ներկայացվել են բարձրարվեստ ստեղծագործություններ: Ծրագիրն աշակերտներին բացառիկ հնարավորություն է տվել ծանոթանալու Հայաստանի ազգային պատկերասրահի գործունեությանը, կառուցվածքին, թանգարանային առարկա հասկացությանը, վերջինիս անվտանգության ու պահպանման հատուկ կանոններին, ինչպես նաև թանգարանի կարևորագույն բաղկացուցիչ հանդիսացող ֆոնդապահոցներում առկա լավագույն ցուցանմուշներին:

Տեղեկացնենք, որ ծրագրում ընդգրկված էին 19-րդ դարի երկրորդ կեսի և 20-րդ դարի հայկական կերպարվեստի առանցքային հեղինակների ստեղծագործությունները: Իրականացվել են մի քանի թեմատիկ ծրագրեր տարբեր տարիքային խմբերի համար` մատչելի լեզվով ու համապատասխան գործիքակազմով. կրտսեր խումբ (1-5 դասարաններ)` «Հեքիաթների աշխարհում», միջին խումբ (5-9 դասարաններ)` «Ճարտարապետության գաղտնիքները», «Ազգային էպոս», ավագ խումբ (9-12 դասարաններ)` «Փորագրանկարչության գաղտնիքները», «Բեմանկարչության արվեստը», «Ծովի տարերքը»:

Յուրաքանչյուր թեմատիկ ծրագրի շրջանակում ներկայացվել են համապատասխան ստեղծագործություններ, կազմակերպվել են կրթական ծրագրեր և դասախոսություններ, որոնք վարել են պատկերասրահի լավագույն մասնագետներ Մարինա Հակոբյանը, Սամվել Հովհաննիսյանը, Հասմիկ Բադալյանը:

Ծրագիրն իրականացվել է երկու փուլով. առաջինը՝ մայիս, իսկ երկրորդը՝ սեպտեմբեր-հոկտեմբեր ամիսներին:

Ծրագրի մեկնարկը տրվել է մայիսի 25-ին Վանաձոր քաղաքի Հովհ. Թումանյանի անվան թիվ 3 հիմնական դպրոցից, որին ներկա էին ՀՀ ԿԳՄՍ նախարարի տեղակալ Ա. Խզմալյանը, ՀՀ Լոռու մարզպետ Ա. Խաչատրյանը, նախարարության Մշակութային ժառանգության և ժողովրդական արհեստների վարչության պետ Ա. Մարաբյանը, ՀԱՊ-ի տնօրեն Մ. Հակոբյանը, Վանաձորի թիվ 3 հիմնական դպրոցի տնօրեն Հ. Կոստանյանը և այլք: Հաջորդ օրերին ծրագիրը ներկայացվել է Ստեփանավան քաղաքի Գրիգոր Լուսավորչի անվան թիվ 2 հիմնական դպրոցում: Այնուհետև ծրագիրը շարունակվել է Դիլիջան քաղաքի թիվ 2 հիմնական դպրոցում, իսկ Խորանաշատի Ավետարանի 800-ամյակին նվիրված միջոցառումների շրջանակում այն իրականացվել է Չինարի գյուղում:

Ծրագրի երկրորդ փուլը սկսվել է սեպտեմբերին՝ ուսումնական տարվա մեկնարկին զուգահեռ: Կրթամշակութային ծրագիրը ներկայացվել է Եղեգնաձոր քաղաքի թիվ 1, Ջերմուկ քաղաքի թիվ 3, Սիսիան քաղաքի թիվ 2 և Գորիս քաղաքի թիվ 5 հիմնական դպրոցներում: Հաջորդիվ այն իրականացվել է Էջմիածին քաղաքի Խաչատուր Աբովյանի անվան թիվ 4 և Արտաշատ քաղաքի թիվ 1 հիմնական դպրոցներում: Սեպտեմբերի վերջին կրթամշակութային ծրագիրը ներկայացվել է Ծաղկաձոր քաղաքի միջնակարգ և Հրազդան քաղաքի թիվ 8 հիմնական ու Գավառ քաղաքի թիվ 4 հիմնական դպրոցներում: Հոկտեմբերին ծրագրի մասնակից են դարձել Աշտարակ քաղաքի թիվ 2 և Գյումրի քաղաքի թիվ 20 հիմնական դպրոցների սաները: Ծրագիրն ավարտվել է 2022 թ. հոկտեմբերի 7-ին:

Ընդհանուր առմամբ՝ «Դասարվեստ» կրթամշակութային ծրագիրն իրականացվել ՀՀ 10 մարզերի՝ 15 մեծ և փոքր բնակավայրերում: Ներկայացված կրթամշակութային ծրագիրն ամենուր դրական արձագանք է գտել և մեծ ոգևորություն առաջացրել թե՛ աշակերտների, թե՛ ուսուցիչների շրջանում:

Նշենք, որ «Դասարվեստ» կրթամշակութային ծրագրին մասնակցել է ՀՀ մարզային դպրոցների շուրջ 1000 աշակերտ: