Մարդիկ չդիմեցին, մտածելով՝ որոշված է, թե ով է Հակակոռուպցիոն կոմիտեի նախագահ լինելու.Դանիել Իոաննիսյան․ ՏԵՍԱՆՅՈՒԹ

Ընթանում է «Իրավունքների պաշտպանություն առանց սահմանների» հասարակական կազմակերպության նախաձեռնած «Հակակոռուպցիոն ինստիտուտների ստեղծումը. մշտադիտարկման արդյունքները և խնդիրները» թեմայով հանրային քննարկումը:

Քննարկման ընթացքում ներկայացվեցին կազմակերպության կողմից իրականացված հակակոռուպցիոն մարմինների՝ Հակակոռուպցիոն բոլոր ատյանի դատարանների դատավորների և Հակակոռուպցիոն կոմիտեի ստեղծման և ինքնավար պաշտոն զբաղեցնող անձանց ընտրությունների մշտադիտարկման արդյունքները և վերհանված խնդիրները:

Անդրադառնալով հակակոռուպցիոն կոմիտեի նախագահի նշանակման գործընթացին՝ «Իրազեկ քաղաքացիների միավորում» ՀԿ համակարգող Դանիել Իոաննիսյանը նշեց, որ երեք թեկնածուներն էլ ունեին խնդիրներ՝ կապված ինչպես բարեվարքության, այնպես էլ հակակոռուպցիոն օրենսդրությունից տեղյակ չլինելու հետ։

«Խնդիրն այն է, որ շատ արժանի թեկնածուներ, որոնք կարող էին հավակնել Հակակոռուպցիոն կոմիտեի նախագահի պաշտոնին, չդիմեցին, մտածելով, որ կանխավ որոշված է, թե ով է լինելու Հակակոռուպցիոն կոմիտեի նախագահ»,- նշեց Իոաննիսյանը։

Անդրադառնալով Մնացական Մարտիրոսյանի աղմկահարույց նշանակմանը, «Իրազեկ քաղաքացիների միավորում» ՀԿ համակարգողն ընդգծեց, որ դա մտահոգիչ է։

«Թե՛ մեր հանձնաժողովը, թե՛ Կոռուպցիայի կանխարգելման հանձնաժողովը և թե՛ միջազգային փորձագետները Մնացական Մարտիրոսյանի վերաբերյալ բացասկան եզրակացություն են տվել։ Եվ եթե գործընթացի վերջում իսկապես նախագահը նրան կնշանակի Հակակոռուպցիոն կոմիտեի դատավոր, մեր հանձնաժողովը կվերանայի իր մասնակցությունն այս գործընթացին։ Ինչո՞ւ ռեսուրսներ ծախսել և լեգտիմացնել պրոցեսը, եթե մեր տված եզրակացությունը ոչ մեկին չի հետաքրքրում»,- նշեց Իոաննիսյանը։

Մանրամասները՝ տեսանյութում։