Հայաստանի խորհրդարանը պարտավոր է պատասխանել Ադրբեջանին․ լռությունը վախի նշան կլինի․ Թևանյան․ ՏԵՍԱՆՅՈՒԹ

ՀՀ Ազգային ժողովում մեկնարկել է ընդդիմադիր «Հայաստան» խմբակցության հրավերով կազմակերպված արտահերթ նիստը։
Նիստի օրակարգում մեկ հարց է` «Հայաստան» խմբակցության պատգամավորներն առաջարկում են, որ ԱԺ-ն հայտարարություն ընդունի ի պատասխան Ադրբեջանի խորհրդարանի՝ 2022 թվականի նոյեմբերի 8-ի հայտարարության։

«Հայաստան» խմբակցության պատգամավոր, հարցի հիմնական զեկուցող Անդրանիկ Թևանյանը հայտնեց, որ 2022 թ. նոյեմբերի 8-ին Ադրբեջանի խորհրդարանն ընդունել է հայտարարություն՝ կապված 44-օրյա պատերազմի հետ, որում օգտագործվել են ձևակերպումներ, որոնք անընդունելի են։

«Մեր տեսանկյունից` սխալ գնահատականներ են տրվել 44-օրյա պատերազմի պատճառներին, ՀՀ–ի հետ խոսվել է ուլտիմատումների և շանտաժի լեզվով, ՀՀ–ին ներկայացվել են անընդունելի և իրավական հիմք չունեցող պահանջներ։ Կիրառվել է ռազմատենչ հռետորաբանություն։ Օգտագործվել է «Արևելյան Զանգեզուր» տերմինը․․․ Խոսվել է միջանցքի մասին․․․ Ասվել է, որ Ղարաբաղն Ադրբեջանի մաս է և ղարաբաղցիների հետ իրենք կխոսեն իրենց ներքին օրենսդրության շրջանակներում»,- նշեց Թևանյանը։

«Հայաստանի խորհրդարանը պարտավոր է ինստիտուցիոնալ մակարդակով պատասխանել Ադրբեջանին։ Լռությունը լավագույն դեպքում կնշանակի վախի նշան, վատագույն դեպքում՝ համաձայնության նշան»,- ընդգծեց ընդդիմադիր պատգամավորը։

Անդրանիկ Թևանյանի դիտարկմամբ՝ շատ վատ ավանդույթ է, որ Ադրբեջանի բոլոր տեսակի ագրեսիաներին համարժեք պատասխան չի տրվում։ «Դա միջազգային հանրության մոտ բերում է համոզմունքի, որ ՀՀ-ն ասելիք չունի Ադրբեջանին և համակերպվել է եղածի հետ, որ համամիտ է Ադրբեջանի այն ձևակերպումների հետ, որոնք սպառնում են ՀՀ-ի և Արցախի տարածքային ամբողջականությանը, անվտանգությանը։ Անարձագանք են մնացել Ալիևի՝ անգամ անձնական վիրավորանքի հասնող հայտարարությունները, պնդումները, թե Արցախն Ադրբեջանի մաս է։ Ցավոք, ՀՀ իշխանությունից հնչում են տեսակետներ, որոնք ցույց են տալիս, որ Երևանի տեսակետն Ալիևի հետ նույնն է։ Եթե դա այդպես չէ, ապա սա հարմար առիթ է բոլորին ցույց տալու, որ մենք ունենք հստակ կարմիր գծեր, որ ունենք Արցախի ինքնորոշման իրավունքի պաշտպանության հանձնառություն»,- նշեց պատգամավորը։

Մանրամասները՝ տեսանյութում։