ԱՄՆ-ը շարունակում է Հայաստանի և Ադրբեջանի ղեկավարների հանդիպում կազմակերպելու ուղիներ փնտրել

Միացյալ Նահանգները շատ ակտիվորեն ներգրավված է Հայաստանի և Ադրբեջանի միջև դիվանագիտական հարաբերությունների հաստատման գործընթացում ու խորապես շահագրգռված է խաղաղության համաձայնագրի կնքման մեջ, և շարունակում է ուղիներ փնտրել երկու երկրների արտաքին գործերի նախարարների և առաջնորդների միջև նոր հանդիպում կազմակերպելու համար: Այս մասին հայտարարել է ԵԱՀԿ-ում ԱՄՆ մշտական ներկայացուցիչ, դեսպան Մայքլ Քարփենթերը՝ պատասխանելով թուրք լրագրողի հարցին, թե ԱՄՆ-ը ինչ պլաններ ունի ՀՀ ու Ադրբեջանի նախարարների միջև հանդիպում կազմակերպելու հարցում, այն համատեքստում, որ Ադրբեջանը հայտարարել է, թե հրաժարվում է խաղաղության բանակցություններից՝ Ֆրանսիայի նախագահ Մակրոնի մասնակցության դեպքում։

«Գաղտնիք չէ, որ մենք շատ սերտորեն աշխատում ենք ԵՄ-ի մեր գործընկերների հետ այս հարցում և նաև դիտարկում ենք ԵԱՀԿ-ի գործիքակազմի տեղակայումը, որը ոչ միայն Հայաստանի խնդրանքով հայ-ադրբեջանական սահմանի հայկական կողմում տեղակայեց կարիքների գնահատման թիմ, այլ նաև մեծապես կաջակցի սահմանին ԵՄ ջանքերին:

Մեր նպատակը պարզ է. մենք կցանկանայինք որքան հնարավոր է շուտ սահմանները սահմանազատված տեսնել. մենք կցանկանայինք որքան հնարավոր է շուտ տեսնել խաղաղության համաձայնագիրը երկու կողմերի միջև, որպեսզի խաղաղությունն ու կայունությունը վերադառնան տարածաշրջան, հարգվեն մարդու իրավունքները և այս տարածաշրջանում ապրող բոլոր անհատների անվտանգությունը, և մենք կարողանանք նոր էջ բացել Հարավային Կովկասի պատմության մեջ։ Ակնհայտ է, որ այդ վերջնական վիճակին հասնելու համար որոշ ժամանակ կպահանջվի, բայց մենք պարտավորվում ենք անել ամեն ինչ՝ աջակցելու այդ արդյունքին»,-ասել է ամերիկացի պաշտոնյան:

Տաթև Ֆռանգյան