ՀԱՊԿ-ը ռազմական աջակցության կտրամադրի՞․ Հայաստանում սպասում են լրամշակված տարբերակին․ՏԵՍԱՆՅՈՒԹ

2020 թվականի պատերազմից հետո Հայաստանը ՀԱՊԿ-ից որևէ տեսակի աջակցություն, այդ թվում՝ ռազմական չի ստացել։ Factor.am-ի հետ զրույցում այս մասին տեղեկացրեց Ազգային ժողովի պաշտպանության և անվտանգության հարցերի մշտական հանձնաժողովի փոխնախագահ Արմեն Խաչատրյանը։
Իսկ ինչ աջակցություն է ակնկալում հայկական կողմը․ ՀԱՊԿ գլխավոր քարտուղարը երեկ մանրամասներ էր հայտնել նոյեմբերի 23-ին Երևանում անցկացված գագաթաժողովից և Հայաստանի վարչապետի չստորագրած փաստաթղթից։ Ստանիսլավ Զասի խոսքով՝ ռազմաքաղաքական այդ կառույցը Հայաստանին առաջարկել է մի շարք միջոցառումներ, այդ թվում՝ առաքելություն ուղարկել Ադրբեջանի հետ սահման՝ իրավիճակը գնահատելու համար։

Հայաստանի վարչապետը առաջարկված նախագիծը հրաժարվեց ստորագրել պատճառաբանելով, թե փաստաթղթում այդպես էլ ներառված չէ կառույցի քաղաքական գնահատականը ադրբեջանական հարձակումներին և Հայաստանի ինքիշխան տարածքի որոշ հատվածների օկուպացիային։ Եթե ՀԱՊԿ-ը չի ընդունում, որ Հայաստանի տարածքները օկուպացված են, ի՞նչ օգնության մասին կարող է խոսք լինել հարցնում է իշխանական պատգամավորը:

Այն, որ ՀԱՊԿ-ում կան լուծում պահանջող խնդիրներ չի հերքում նաև ընդդիմադիր Հայաստան խմբակցության ղեկավար Սեյրան Օհանյանը, բայց և շեշտում է՝ շատ վատ է, որ մեկուկես տարի նախագահելով ռազմաքաղաքական այդ կառույցում Հայաստանը չի կարողացել համաձայնեցնել հայկական կողմի համար ցանկալի փաստաթուղթ։

Եթե անգամ այդ փաստաթուղթը ստորագրվեր, միևնույն է, Հայաստանին որևէ օգնություն չէր տրամադրվի հակադարձում է իշխող մեծամասնությունից Արմեն Խաչատրյանը։ Եվ չնայած այս պնդմանը Խաչատրյանը հույս է հայտնում, որ ռազմաքաղաքական այդ կառույցը կկատարի պայմանագրային պարտավորությունները և անդամ երկների ստորագրմանը կներկայացվի նախագծի լրամշակված տարբերակ։
Ու թեև ՀԱՊԿ-ից պայմանագրային պարտավորությունների կատարման ուղղությամբ արդեն տևական ժամանակ է՝ որևէ շոշափելի քայլ չի արվում, այդուհանդերձ, ընդդիմադիր պատգամավոր պաշտպանության նախկին նախարար Սեյրան Օհանյանն այն կարծիքին է, որ Հայաստանի ռազմավարական դաշնակիցը կա և մնալու է այդ կառույցի առանցքային անդամ Ռուսաստանը։

Մինչ այս պահը փաստաթղթերի լրամշակման և դրա հնարավոր ստորագրման մասին որևէ տեղեկություն չկա։ Միայն Կառավարության վերջին նիստում վարչապետ Նիկոլ Փաշինյանը հայտնեց, որ դրանք ուղարկվել են լրամշակման՝ կրկին հույս հայտնելով, որ կկարողանան համաձայնության գալ։

Մանրամասները՝ տեսանյութում։

Շողիկ Գալստյան