07.05.2024 | 14:00
Չեմ կարծում, որ ամեն տարի պետք է ՌԴ-ում մասնակցեմ շքերթին. Փաշինյան․ ՏԵՍԱՆՅՈՒԹ
Տիգրան Խզմալյանը և բերման ենթարկված մյուս 3 անձինք ազատ արձակվեցին
Հասարակություն
23.11.2022 | 18:52
«Մենք պաստառներով և բարձրախոսով պատրաստվում էինք մեքենա նստել ու շարժվել Ազատության հրապարակ,սակայն ոստիկանները, առանց որևէ բան ասելու, բերման ենթարկեցին մեզ»,-Factor.am-ի հետ զրուցում ասաց «Հայաստանի եվրոպական կուսակցության» նախագահ Տիգրան Խզմալյանը, որին այսօր առավոտյան բերման էին ենթարկվել։
Ոստիկանությունը Factor.am-ին փոխանցել էր, որ 4 քաղաքացիները բերման են ենթարկվել ՎԼՎ 182-րդ հոդվածի հատկանիշներով, այն է՝ ոստիկանի օրինական պահանջին չենթարկվելը։ Խզմալյանը, սակայն, հերքում է, նշելով, որ իրենք բերման են ենթարկվել առանց որևէ դիմադրության. «Մեզ բերման ենթարկեցին ուղղակի, առանց որևէ հիմքի»։
Հիշեցնենք՝ Երևանում ՀՀ վարչապետ Նիկոլ Փաշինյանի գլխավորությամբ տեղի է ունենում ՀԱՊԿ հավաքական անվտանգության խորհրդի նիստ։ Նիստին մասնակցում են Ռուսաստանի Դաշնության նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, Տաջիկստանի նախագահ Էմոմալի Ռահմոնը և ՀԱՊԿ գլխավոր քարտուղար Ստանիսլավ Զասը։ ՀԱՊԿ ղեկավարներն ի թիվս այլ հարցերի, քննարկում են Հայաստանին օգնության հարցը։
Այս առիթով այսօր մայրաքաղաքի տարբեր հատվածներում բողոքի ակցիաներ իրականացվեցին, ինչի առթիվ ոստիկանությունն ուժեղացված ծառայություն էր իրականացնում։
Ռոզա Վարդանյան
