Ագրեսորների դեսանտ է իջել ՀՀ-ում՝ դասալիքի պես լքեցին մեզ, Ադրբեջանը ներխուժեց, ի՞նչ օգնել․ Ազատ Արշակյան․ ՏԵՍԱՆՅՈՒԹ

Factor TV–ի հարցազրույցը քաղաքական գործիչ, նախկին պատգամավոր Ազատ Արշակյանի հետ

-Հայաստանում ընթանում է ՀԱՊԿ գագաթնաժողովը։ Ի՞նչ սպասելիքներ ունեք ՀԱՊԿ-ի այս նիստից։

-Մեզ համար, մեր անվտանգությունն ապահովող որևէ դրական բան չկա։ Միակ դրական բանը, որ այս դեսանտը բերեց Հայաստան, դա ընդվզման և ընդվզողների բացահայտումն էր։ Այսինքն՝ լյուստրացիա տեղի ունեցավ․ սա չափազանց կարևոր բան է, ժողովրդավարական փոքր բողոքի ակցիա է տեղի ունենում բռնապետների ակումբի դեսանտի դեմ։ Եթե ճիշտ տերմիններ օգտագործենք, պետք է ասենք, որ ОДКБ-ն ճիշտ չէ, որ թարգմանում ենք ՀԱՊԿ, ОДКБ-ի դեսանտն իջել է Հայաստան, և Հայաստանում կան մարդիկ, քաղաքացիներ, որոնք դեմ են և չեն ուզում նրանց տեսնել Հայաստանում։ Դա է միակ օգուտը, որ մենք լյուստրացիա ենք անում և տեսնում՝ ով է բռնապետության, անազատության կողմնակից և ով է ազատության ու ժողովրդավարության կողմնակից։ Դա միակ արդյունքն է։ Իսկ թե ուր կգնան, ում հետ և ինչ կքննարկեն, ընդհանրապես մեզ չի հետաքրքրում։

-Ընդհանրապես, Հայաստան պետության վարկանիշի համար ի՞նչ նշանակություն կարող է ունենալ, նաև ժողովրդավարական աշխարհի աչքում, այն, որ փաստորեն Հայաստան են գալիս արյունալի պատերազմ սանձազերծող դիկտատորներ, ինչպես Դուք նշեցիք, Պուտինը, Լուկաշենկոն։ Այդ պատերազմի հետևանքով հենց հիմա մահանում են երեխաներ, խաղաղ բնակիչներ, թիրախավորվում են խաղաղ բնակավայրեր՝ այնպես, ինչպես Ալիևն է թիրախավորում Հայաստանի սահմանային բնակավայրերը, և զոհվում են խաղաղ բնակիչներ։ Երկու պարագայում էլ՝ թե՛ Ալիևը, թե՛ Պուտինը, բռնի ուժով գրավում են այլ երկրի տարածքներ։ Նրանց գալը Հայաստան ինչպե՞ս կարող է անդրադառնալ Հայաստանի վարկանիշի վրա։

-Նախևառաջ, հիմա մի մոդայիկ տերմին կա, նրանց ասում են «տոքսիկ», այսինքն՝ հիմա Հայաստանը թունավոր միջավայրում է։ «Վարակակիր» անձնավորություններ, քաղաքական գործիչներ են եկել Հայաստան, իհարկե, այստեղ պետք է կարանտինային, հակաբացիլային, հակավիրուսային միջոցներ ձեռնարկել։ Մեր ձեռքը սեղմելիս նրանք պետք է իմանան, որ «վարակ» են փոխանցում, և դա ազդելու է մեր անվտանգության աստիճանի վրա։

Երբ մենք ասում ենք՝ Հայաստանի վարկն ինչ կլինի, դա հենց նշանակում է անվտանգության աստիճան։ Ինչքան տեղավորվում ենք այդ ակումբում, այդքան մեր երկիրը դառնում է վտանգավոր երկիր, քանի որ դա ագրեսորների ու բռնապետների ակումբ է․ ասա՝ ով է ընկերդ, ասեմ՝ ով ես դու։ Եվ հիմա ողջագուրվելու ենք նրանց հետ, և դա ոչ միայն մեր անվտանգության, այլ նաև աշխարհի համար է վտանգավոր։

Հարցազրույցն ամբողջությամբ՝ տեսանյութում։

Ռոբերտ Անանյան