«Յուրաքանչյուր ադրբեջանցի իրանցի է, յուրաքանչյուր իրանցի՝ ադրբեջանցի»․ Իրանի Գերագույն առաջնորդի խորհրդականը հերքել է Ադրբեջանի դեմ հարձակման մեղադրանքները

Իրանի Գերագույն հոգևոր առաջնորդի միջազգային հարցերով խորհրդական Ալի Աքբար Վելայաթին հերքել է պնդումներն այն մասին, որ Թեհրանը, իբր, մտադիր է հարձակվել Ադրբեջանի վրա։ Այս մասին գրում է Mehr գործակալությունը՝ վկայակոչելով Tasnim News Agency-ում պաշտոնյայի հոդվածը։

Հրապարակման մեջ Վելայաթին ընդգծել է« ադրբեջանցի ժողովրդի առանցքային դերը Իրանի պատմության մեջ և նրանց կարևոր քայլերը երկրի պաշտպանության և Իրանի հզորության ու տարածաշրջանային նշանակալի դերի խթանման գործում»: Նա նաև հերքել է Իրանի դեմ հնչող մեղադրանքները, որ Իսլամական Հանրապետությունը ծրագրել է հարձակվել Ադրբեջանի վրա կամ զավթել իշխանությունը հարևան երկրում:

Նա նաև անդրադարձել է երկու ժողովուրդների միջև տարածված քաղաքական և լրատվական լարվածությանը՝ կրկնելով, որ բոլոր իրանցիները, անկախ իրենց ազգային պատկանելությունից, համարվում են իրանցիներ: Երկրորդ, նրա խոսքով, Իրանը երբեք չի նախանձել իր հարևաններին. հակառակը, միշտ ցուցաբերել է ուշադրություն նրանց նկատմամբ և ցանկություն է դրսևորել դրական հարաբերություններ պահպանել բոլորի հետ։

«Այսօր պետք է ասել, որ յուրաքանչյուր ադրբեջանցի իրանցի է, յուրաքանչյուր իրանցի՝ ադրբեջանցի: Դա ճիշտ է, եթե նույնիսկ նրանք ունեն ոչ իրանական անձնագիր կամ բնակվում են Իրանից դուրս»,- ասել է Վելայաթին։

Նա հավելել է, որ ինքն էլ ադրբեջանցի է․ «Ես հպարտությամբ ասում եմ, որ մյուս իրանցիների պես՝ ես ինձ ադրբեջանցի եմ համարում։ Ես Ալբորզ լեռների ստորոտից եմ, բայց Իրանում որտեղ էլ լինեմ, ես տուն կոչում: Ինչպես մյուս իրանցիները՝ ես հպարտորեն Իրանի յուրաքանչյուր հատված դիտում եմ որպես իմ հոգու և սրտի մի անկյուն և նույնիսկ կյանքս կտամ այն ​​պաշտպանելու համար»։

Ըստ աղբյուրի՝ Վելայաթիի խոսքերն արձագանքն են Ադրբեջանի նախագահ Իլհամ Ալիևի վիճահարույց հայտարարությանը Թյուրքական պետությունների կազմակերպության 9-րդ գագաթնաժողովի ժամանակ՝ ի պատասխան վերջերս Հայաստանի և Ադրբեջանին սահմանին անցկացված նախապես ծրագրված զորավարժությունների։

Էմմա Չոբանյան