25.11.2024 | 19:14
Ինչու է իջեցվել Կառավարության շենքի վրայի դրոշը
Թյուրքական աշխարհը գլուխ չի խոնարհում ոչ մի սպառնալիքի առաջ՝ լինի դա ԵՄ-ն, թե ԱՄՆ-ը․ Չավուշօղլու
Քաղաքականություն
18.11.2022 | 22:42
Թուրքիայի ԱԳ նախարար Մևլութ Չավուշօղլուն Մեքսիկայի իր գործընկեր Մարսելո Էբրարդի հետ Անկարայում կայացած համատեղ մամուլի ասուլիսում անդրադարձել է նաև չճանաչված Հյուսիսային Կիպրոսի խնդիրներին, հատկապես՝ Արևմուտքի դժգոհությանը՝ կապված չճանածված հանրապետությանը Թյուրքական պետությունների կազմակերպությունում դիտորդի կարգավիճակ տալուն, գրում է Անադոլու գործակալությունը։
«Մենք որևէ մեկի թույլտվության կարիքը չունենք, որ Հյուսիսային Կիպրոսի թուրքական հանրապետությունը դառնա միջազգային կազմակերպության անդամ-դիտորդ։ Մեր ուղերձն ԱՄՆ-ին այն է, որ նրանք խախտել են հավասարակշռությունը ինչպես թուրք-հունական հարաբերություններում, այնպես էլ Կիպրոսում։ Եղեք հավասարակշիռ, երբ խոսում եք միջազգային իրավունքի մասին, նայեք Հունաստանի խախտումներին։ Սկսվել է թուրքական դարը, թուրքական գարունը։ Մենք կարող ենք ասել, որ Թյուրքական պետությունների կազմակերպությանը Հյուսիսային Կիպրոսի միացմամբ բացվել է նոր դարաշրջան։ Այս հարցում մեզ պետք չէ ԱՄՆ-ի կամ մեկ ուրիշի թույլտվությունը»,- ասել է Չավուշօղլուն։
Նա նաև նշել է, թե «տեսել ենք՝ ինչպես է ԱՄՆ-ն, հատկապես՝ ԵՄ-ն, Թյուրքական պետությունների կազմակերպության անդամների վրա ճնշում գործադրում ու նույնիսկ սպառնում»։
«Նրանց վրա շատ լուրջ ճնշումներ են գործադրվել, նոտաներ են հանձնել, նամակներ գրել։ Բայց սա չպետք է մոռանալ. կա թյուրքական աշխարհ, որը գլուխ չի խոնարհում ոչ մի սպառնալիքի առաջ՝ լինի դա ԵՄ-ն, թե ԱՄՆ-ը։ Թյուրքական աշխարհի միասնությունը կարևոր է աշխարհում ու տարածաշրջանում կայունության համար։ Սպառնալիքները մի կողմ թողեք, եկեք համագործակցենք, քայլեր ձեռնարկենք՝ ի շահ բոլոր կողմերի։ Սա դեռ սկիզբն է, անհրաժեշտ քայլերը կհետևեն»,- ասել է Չավուշօղլուն։
Հիշեցնենք, որ չճանաչված Հյուսիսային Կիպրոսի թուրքական հանրապետությունը Թյուրքական պետությունների կազմակերպությունում դիտորդ երկրի կարգավիճակ է ստացել։ Որոշումը կայացվել է վերջերս Սամարղանդում անցկացվող Թյուրքական պետությունների և կառավարությունների ղեկավարների 9-րդ գագաթնաժողովում։
Այս որոշումը դատապարտել են Կիպրոսը, Հունաստանը, ինչպես նաև ԵՄ-ն։
Էմմա Չոբանյան
