27.07.2026 | 11:32
Թրամփը «որոշակի տարածք» է տալիս Իրանի հետ բանակցություններին․ հարվածները դադարեցվել են
Ադրբեջանի ՊՆ ղեկավարը Թբիլիսիում է․ նա հանդիպել է Վրաստանի վարչապետին
Քաղաքականություն
14.11.2022 | 18:24
Ադրբեջանի պաշտպանության նախարար Զաքիր Հասանովը պաշտոնական այցով Վրաստանում է։ Նա հանդիպել է վրացի իր գործընկերոջ Ջուանշեր Բուրչուլաձեի հետ, գրում են ադրբեջանական լրատվամիջոցները։
Նշվում է, որ կողմերը մտքեր են փոխանակել տարածաշրջանային անվտանգության, ռազմական համագործակցության զարգացման հեռանկարների, համատեղ զորավարժությունների անցկացման, աշխատանքային հանդիպումների կազմակերպման շուրջ։ Քննարկվել են նաև ռազմական, ռազմատեխնիկական, ռազմակրթական, ռազմաբժշկական ոլորտներում համագործակցության հետագա ընդլայնման, ինչպես նաև փոխադարձ հետաքրքրություն ներկայացնող այլ հարցեր։
Երկու երկրների պաշտպանության նախարարները նաև ստորագրել են 2023 թվականի երկկողմ ռազմական համագործակցության պլանը։
Բացի այդ, Զաքիր Հասանովը հանդիպել է Վրաստանի վարչապետ Իրակլի Ղարիբաշվիլիի հետ։ Ըստ ադրբեջանական կողմի՝ հանդիպմանը նշվել է, որ ադրբեջանա-վրացական հարաբերությունները հիմնված են բարեկամության և փոխադարձ վստահության վրա։ Ընդգծվել է այս տարվա հոկտեմբերին Ադրբեջանի նախագահ Իլհամ Ալիևի՝ Վրաստան կատարած այցի առանձնահատուկ նշանակությունը։ Նշվել է, որ պետությունների ղեկավարների պարբերական հանդիպումները նպաստում են երկկողմ հարաբերությունների հետագա ամրապնդմանը։
Անդրադառնալով տարածաշրջանում ռազմաքաղաքական իրավիճակին՝ կողմերը նշել են երկու երկրների տարածքային ամբողջականության փոխադարձ աջակցության կարևորությունը, ընդգծել, որ երկկողմ ռազմական համագործակցության զարգացումը կնպաստի տարածաշրջանում կայունության և անվտանգության ապահովմանը։
Էմմա Չոբանյան
