29.04.2026 | 18:50
Ժոզե Մոուրինյուն արձագանքել է «Ռեալ» վերադառնալու մասին լուրերին
Փաստաբան Էրիկ Ալեքսանյանը կմնա կալանքի տակ. վերաքննիչ բողոքը մերժվեց
Հասարակություն
11.11.2022 | 19:51
Մի շարք աղմկահարույց քաղաքական գործերով հայտնի փաստաբան Էրիկ Ալեքսանյանը կշարունակի մնալ կալանավորված։ Վերաքննիչ քրեական դատարանը, դատավոր Լուսինե Աբգարյանի նախագահությամբ, քիչ առաջ որոշում կայացրեց մերժել պաշտպանական կողմի՝ խափանման միջոց կալանավորման դեմ ներկայացված բողոքը։ Այս մասին Factor.am-ի հետ զրույցում ասաց Ալեքսանյանի պաշտպան Ժիրայր Ղարագյոզյանը։
«Կալանավորման դեմ ներկայացված բողոքի հիմքում նշել էինք հիմնավոր կասկածի բացակայությունը։ Այս որոշումը ևս բողոքարկելու ենք Վճռաբեկ և անգամ Մարդու իրավունքների եվրոպական դատարանում»,- ասաց Ղարագյոզյանը։
Նշենք, որ Էրիկ Ալեքսանյանը կալանավորվել էր հոկտեմբերի 19-ին՝ դատավոր Արշակ Մաթևոսյանի որոշմամբ։
Հիշեցնենք՝ հոկտեմբերի 17-ին հայտնի դարձավ, որ ԱԱԾ-ն ձերբակալել է փաստաբան Էրիկ Ալեքսանյանին։ Առաջադրված մեղադրանքը, Ալեքսանյանի փաստաբան Գայանե Պապոյանի հավաստմամբ, վերաբերում է բացառապես նրա փաստաբանական գործունեությամբ իրականացված օրինական գործառույթներին, այն է՝ Ալեքսանյանը, որպես փաստաբան, իր պաշտպանյալին կալանքից ազատելու միջնորդություն է ներկայացրել դատարան։
Նույն գործով անցնում է նաև դատավոր Արուսյակ Ալեքսանյանը, որը նույնպես ներկայում կալանավորված է։ Նրան մեղադրանք է առաջադրվել պաշտոնեական լիազորությունները չարաշահելու, իսկ փաստաբան Էրիկ Ալեքսանյանին՝ նրան աջակցելու համար:
Ռոզա Վարդանյան
