23.04.2026 | 14:00
10 մլն դրամանոց ժամացույց, կանխիկ՝ 200 հազար դոլար, 100 մլն դրամ, 50 հազար եվրո, 6 անշարժ գույք․ Դավիթ Ղազինյանի հայտարարագիրը
Հայաստանին և Ադրբեջանին կոչ ենք անում շրջել թշնամանքի էջը և շարունակել հաշտեցման ջանքերը. ԵՄ-ն հայտարարություն է տարածել
Քաղաքականություն
11.11.2022 | 16:15
Եվրամիությունն այսօր՝ նոյեմբերի 11-ին հայտարարություն է տարածել Արցախյան 44-օրյա պատերազմի երկրորդ տարելիցի կապակցությամբ։ ԵՄ դիվանագիտական գերատեսչության պաշտոնական ներկայացուցիչ Պիտեր Ստանոյի անունից տարածված հայտարարության մեջ ընդգծվում է, որ ԵՄ-ն կշարունակի իր միջնորդական ջանքերը Հայաստանի և Ադրբեջանի միջև հակամարտության կարգավորման գործում։
Ըստ հայտարարության՝ ի պատասխան երկու կողմերի ցանկության՝ Եվրամիությունը կշարունակի իր գործունեությունը, ներառյալ՝ ԵՄ Խորհրդի նախագահ Շառլ Միշելի անձնական ջանքերը, բարձր ներկայացուցիչ Ժոզեպ Բորելի, հատուկ ներկայացուցիչ Տոյվո Կլաարի մասնակցությամբ և ԵՄ մեխանիզմների կիրառմամբ։ Բրյուսելը նաև պարտավորվում է շարունակել աջակցել կողմերին բոլոր չլուծված հարցերի համապարփակ և արդարացի կարգավորման ուղղությամբ։
«Այս շաբաթ լրանում է Լեռնային Ղարաբաղի հակամարտության գոտում 44-օրյա պատերազմի ավարտի երկրորդ տարին։ Այս առիթով ԵՄ-ն հարգում է վերջին 30 տարիների ընթացքում ադրբեջանական և հայկական կողմերի հակամարտության բոլոր զոհերի հիշատակը։ Լիովին գիտակցելով այս դժվարին ժառանգությունը՝ մենք երկու կողմերին կոչ ենք անում շրջել թշնամության էջը և շարունակել ջանքերը հրադադարի համար՝ կանխելու հետագա մարդկային կորուստներն ու վնասները։
Եվրոպական Միությունը նաև ողջունում է Հայաստանի և Ադրբեջանի ղեկավարության կողմից ձեռնարկված բազմաթիվ քայլերը՝ իրենց տարաձայնությունները հաղթահարելու և տարածաշրջանում երկարատև ու կայուն խաղաղության հասնելու համար։ ԵՄ-ն բարձր է գնահատում նրանց կայուն ներգրավվածությունը տարբեր մակարդակներում և տարբեր ձևաչափերով ընթացող բանակցություններում: Թեև այս բանակցություններն ակնհայտորեն բարդ են և ժամանակ կպահանջեն, կարևոր է չկորցնել պահը, համաձայնեցնել առաջ ընթանալու կոնկրետ քայլերը և ապահովել անվտանգ, ապահով և բարեկեցիկ միջավայր՝ ի շահ տարածաշրջանի ողջ բնակչության»,- նշել է Պիտեր Ստանոն:
ԵՄ-ն կողմերին նաև կոչ է անում մեղմացնել հռետորաբանությունը, զերծ մնալ միմյանց դեմ ուղղված սպառնալիքներից ու պահանջներից և կանխել լարվածության աճը։
«Դեռևս փխրուն միջավայրում, վերջին 30 տարիների վերքերը դեռ չբուժված, ԵՄ-ն կրկնում է իր կոչը կողմերին՝ մեղմել իրենց հռետորաբանությունը և խուսափել լարվածության ցանկացած անհարկի սրումից, ներառյալ՝ զերծ մնալով միմյանց հասցեին սպառնալիքներից կամ մեղադրանքներից, ինչպես նաև ռազմական սադրանքներից և գործողություններից»,- ասվում է ԵՄ հայտարարությունում:
Տաթև Ֆռանգյան
