14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Պուտինի գալը ՀՀ դիվերսիոն օպերացիա է․ միջանցք բացելու նպատակ ունի՝ ՀԱՊԿ-ի երաշխիքով․ Տիգրան Ավագյան․ ՏԵՍԱՆՅՈՒԹ
Քաղաքականություն
10.11.2022 | 21:32
ՌԴ Պաշտպանության նախարարությունը նոյեմբերի 9-ին հայտնել է, որ հրահանգվել է ռուսական զինուժին դուրս բերել զորքերը Խերսոնի մարզից։ Ուկրաինական այդ տարածքը Մոսկվան օկուպացրել էր պատերազմի սկզբի ամիսներին։ Ուկրաինայի դեմ ռուսական պատերազմի հրամանատար Սերգեյ Սուրովիկինը առաջարկել է ՌԴ Պաշտպանության նախարար Սերգեյ Շոյգուին Խերսոնից դուրս բերված ստորաբաժանումները տեղափոխել Դնեպրի ձախ ափ։ Ուկրաինայի նախագահ Վլադիմիր Զելենսկին հայտարարել է, որ ուկրաինական բանակն արդեն շարժվում է հարավային ուղղությամբ և ազատագրում նոր տարածքներ։
Factor TV-ի հարցազրույցում Ուկրաինայի ներքին գործերի նախկին փոխնախարար, քաղաքագիտության դոկտոր Տիգրան Ավագյանը, ներկայացնելով ռազմաճակատում ստեղծված դրությունը, պատմում է հետևյալը․ «Ըստ ամենաարդի նորությունների՝ ռուսական զորքերը տարհանվում են Խերսոնի տարածքից՝ և՛ քաղաքից, և՛ մերձավոր տարածքներից։ Այնտեղ կենտրոնացված են ամենից էլիտար ռուսական զորքերը, և իրենք հանվում են Դնեպրի ձախ ափ։ Գետի աջ ափը շուտով ազատագրված կլինի ռուսական օկուպացիոն զորքերից։ Ուկրաինական բանակը գնում է առաջ՝ ազատագրելով նոր տարածքներ, և այսպիսով՝ ռուսներն ուղղակի իրենց փախուստին կազմակերպված տեսք են տալիս»։
Նոյեմբերի 22-ին, ըստ նախնական տեղեկությունների, Հայաստան է ժամանելու ՌԴ նախագահ Վլադիմիր Պուտինը։ Նա պետք է մասնակցի ՀԱՊԿ հավաքական անվտանգության խորհրդի նիստին։ Ակնկալվում է, որ պետք է քննարկվի ռազմական աջակցության ՀՀ-ի դիմումը։ Քաղաքագիտության դոկտոր Տիգրան Ավագյանի գնահատմամբ՝ Պուտինի այցը Հայաստանի դիվերսիոն օպերացիա է, քանի որ ՀՀ-ից միջանցք ստանալու նպատակ ունի նա, և ՀԱՊԿ-ի երաշխիքներ մեջտեղ բերելով՝ կարող է խոստանալ անվտանգություն ճանապարհներին։ Ըստ Ավագյանի՝ ՀՀ իշխանությունները պետք է մերժեն նման տրամաբանությունը։
Հարցազրույցն ամբողջությամբ՝ տեսանյութում։
Ռոբերտ Անանյան
