04.10.2026 | 20:00
1700 տոննա աղբ՝ օրական․ ինչ գնով է մաքրվում Երևանը. աղբահանության ՇԵՐՏԵՐԸ․ ՏԵՍԱՆՅՈւԹ
Սեռով պայմանավորված հղիության ընդհատում հիմնականում 3-րդ երեխայի դեպքում է լինում․ ՏԵՍԱՆՅՈՒԹ
07.11.2022 | 14:39
Հայաստանում ավելի շատ տղա երեխաներին նախապատվություն տալու ցուցանիշները սուր են եղել 1990-2000-ական թվականերին: Այդ ժամանակ երկրում ծնված երեխաների սեռային համամասնությունը եղել է հետևյալ կերպ՝ 120 տղա, 100 աղջկա դիմաց: Մինչդեռ բնական է համարվում 105 տղա 100 աղջկա դիմաց համամասնությունը: ՄԱԿ-ի բնակչության հիմնադրամն այս հարցին առաջին անգամ անդրադարձ է կատարել 2010 թվականին և ուսումնասիրությունները ցույց են տվել, որ այդ ցուցանիշը նվազել է:
«Այդ ժամանակ տվյալները ցույց տվեցին, որ ունեցել ենք 114 տղայի դիմաց 100 աղջիկ հարաբերակցությունը: Շնորհիվ պետության ու միջազգային կառույցների ջանքերի կարողացել ենք հասնել նրան, որ դրական միտումը պահպանվի: 2021 թվականին մենք ունեցել ենք 108,8 տղայի դիմաց 100 աղջիկ հարաբերակցությունը: Սա, իհարկե, հեռու է բնական ցուցանիշներից: Ցավոք, 2022 թվականի առաջին կիսամյակում մենք ունեցել ենք աճ 3 միավորով, սակայն չէի շտապի ասել, որ սրանք ամփոփ տվյալներ են: Սպասենք տարվա արդյունքներին»,- այսօր հրավիրված ասուլիսում այս մասին նշեց ՄԱԿ-ի Բնակչության հիմնադրամի սեռի խտրական ընտրության դեմ պայքարի ծրագրի համակարգող Զարուհի Տոնոյանը:
Նրա խոսքով՝ սեռով պայմանավորված հղիության ընդհատում հիմնականում 3-րդ երեխայի դեպքում է լինում
Նշենք, որ ՄԱԿ-ի Բնակչության հիմնադրամը գործընկեր կազմակերպությունների հետ անցկացրել է «Հայաստանում պտղի սեռով պայմանավորված հղիության արհեստական ընդհատման տարածվածությունը և պատճառները» խորագրով հետազոտություն: Նպատակն է բացահայտել նոր տվյալներ սեռով պայմանավորված երեխաների նկատմամբ քաղաքացիների վերաբերմունքը, նախապատվությունը։ 2022 թվականի հետազոտությունները ցույց են տալիս, որ սեռով պայմանավորված երեխաների նկատմամբ հավասար վերաբերմունք ցույց տալու կշիռը նվազել է: Ընդհանուր առմամբ մարզերում նկատվում է, որ տղա երեխայի նկատմամբ նախապատվությունն ավելացել է: Եթե 2017 թվականին հարցմանը մասնակցածների 75 տոկոսը Գեղարքունիքի մարզում ասում էր, որ հավասար վերաբերմունք է ցուցաբերում երկու սեռերի նկատմամբ, ապա այս տարվա հետազոտությունը ցույց է տվել, որ այդ ցուցանիշը նվազել է մինչև 60 տոկոսի: Ամենալավ ցուցանիշը Կոտայքի մարզում է՝ 77 տոկոս: Մայրաքաղաք Երևանում այս ցուցանիշը կազմում է 75 տոկոս:
Մանրամասերը՝ տեսանյութում։
