25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Բեռլինը չի բացառում Իրանի Իսլամական հեղափոխության պահապանների կորպուսը որպես ահաբեկչական խմբավորում ճանաչելը
Քաղաքականություն
31.10.2022 | 22:24
Իրանում բողոքի ցույցերի դաժան ճնշման ֆոնին Գերմանիայի արտաքին գործերի նախարար Աննալենա Բաերբոքը հնարավոր է համարել Իսլամական հեղափոխության պահապանների կորպուսը (ԻՀՊԿ) ահաբեկչական կազմակերպությունների ցուցակում ներառելը:
«Իրանի դեմ պատժամիջոցների ևս մեկ փուլ կկիրառվի և կուսումնասիրվի Իսլամական հեղափոխության պահապանների կորպուսը որպես ահաբեկչական խմբավորում ճանաչելու հնարավորությունը»,-, ասել է նա գերմանական ARD հեռուստաալիքին տված հարցազրույցում, փոխանցում է DW-ի ռուսական ծառայությունը։
ԱՄՆ-ն Իսլամական հեղափոխության պահապանների կորպուսը ճանաչել է որպես ահաբեկչական կազմակերպություն 2019 թվականին՝ Դոնալդ Թրամփի նախագահության օրոք Թեհրանի հետ կոնֆլիկտի սրման ֆոնին: ԵՄ-ի համանման ցուցակում Իրանի այս էլիտար ստորաբաժանումը դեռևս նշված չէ։ Այս ցուցակում ընդգրկումը Բրյուսելին թույլ կտա սառեցնել ԻՀՊԿ-ի ակտիվները:
Իսլամական հեղափոխության պահապանների կորպուսը անմիջականորեն ենթարկվում է Իրանի հոգևոր առաջնորդ այաթոլլա Ալի Խամենեիին և մեծ քաղաքական և տնտեսական ազդեցություն ունի երկրում։ Հոկտեմբերի 29-ին Իսլամական հեղափոխության պահապանների կորպուսի հրամանատար Հուսեյն Սալամին պահանջեց դադարեցնել զանգվածային ցույցերը, որոնք շարունակվում են սեպտեմբերի կեսերից։ Չնայած նրա սպառնալիքներին՝շաբաթվա վերջին հազարավոր իրանցիներ կրկին ցույցի դուրս եկան։
Հիշեցնենք՝ բողոքի զանգվածային ցույցերն Իրանում սկսվել են 22-ամյա Մահսա Ամինիի մահից հետո։ Երիտասարդ աղջկան հիջաբի «ոչ պատշաճ կրելու» պատճառով բերման էր ենթարկել բարոյականության ոստիկանությունը, նրան տարել էին բաժին, հետո տեղափոխել էին հիվանդանոց, որից մի քանի օր անց նա մահացել էր։
Տաթև Ֆռանգյան
