14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Ադրբեջանցիները ներխուժել են ՀԱՊԿ-ի, ՌԴ-ի պատասխանատվության գոտի․ հակառուսականություն չէ՛ գնահատականի պահանջը․ Մարիա Կարապետյան․ ՏԵՍԱՆՅՈՒԹ
Քաղաքականություն
27.10.2022 | 20:02
ՌԴ Պետդումայի ԱՊՀ հարցերով հանձնաժողովի առաջին փոխնախագահ Կոնստանտին Զատուլինը վիրավորական ու անսպասելի է որակել Հայաստանի Ազգային ժողովի արձագանքը։ Նրա մուտքը Հայաստան արգելվել է՝ միջանցք պահանջելու և ՀՀ ներքաղաքական կյանքին միջամտող գնահատականներից հետո։ Զատուլինը տելեգրամում գրել է, որ ինքը համոզված է՝ այդ քայլը վկայում է Հայաստանի իշխանությունների նոր կուրսի մասին։
Ռուսաստանաբնակ հայ գործարարներ էլի խոսում են ՀՀ-ում առկա, իբր, հակառուսականությունից։ Իսկ ԱԺ-ի ընդդիմությունը ՀՀ կառավարող ուժին ուղիղ է մեղադրում հակառուսականության մեջ Հայաստան Զատուլինի մուտքն արգելելուց հետո։ Բացի այդ՝ ՀԱՊԿ-ից և ՌԴ-ից Ադրբեջանի ներխուժման ժամանակ ռազմական աջակցություն չստանալը ևս ԱԺ-ի ընդդիմությունը պայմանավորում է ՀՀ իշխանությունների քայլերով․ օրինակ՝ Նիկոլ Փաշինյանը տարիներ առաջ Պուտինին չի դիմավորել օդանավակայանում կամ ՀԱՊԿ-ի գլխավոր քարուղարի պաշտոնից ոչ պատշաճ ձևով է հետ կանչվել Յուրի Խաչատուրովը։
ԱԺ «Քաղաքացիական պայմանագիր» խմբակցության պատգամավոր Մարիա Կարապետյանը Factor TV-ին տված հարցազրույցում ասում է, որ իրենց հաճախ են մեղադրում ռուսամետ կամ արևմտամետ լինելու մեջ, բայց ՀՀ կառավարող ուժը չունի այդպիսի ուղղվածություն․ «Մենք հայաստանակենտրոն ենք՝ ունենք պրոհայաստանյան ուղղվածություն, ինչը բնական է, և ՀՀ բոլոր քաղաքական ուժերը պետք է այդպիսի ուղղվածություն ունենան»։
Անդրադառնալով այն երևույթին, որ ՀԱՊԿ-ին և ՌԴ-ին ուղղված ՀՀ կառավարող ուժից հնչող դժգոհությունները մտցվում են «հակառուսականության» լույսի տակ, Մարիա Կարապետյանը նշեց․ «Ես կվերահաստատեմ մեր դիրքորոշումը, որ նոյեմբերի 9-ի և հունվարի 11-ի հայտարարությունները ամբողջությամբ կատարված չեն Ադրբեջանի կողմից՝ գերիների վերադարձի, ռեգիոնի ապաշրջափակման հարցով կառուցողականություն ցուցաբերելու և աշխատանքային խմբում ձեռք բերված պայմանավորվածություններն իրագործելու մասով։ Այն, որ դրանք կատարված չեն, ես՝ որպես ՀՀ պետական պաշտոնյա, պետք է խոսեմ դրա մասին։ Նաև նոյեմբերի 9-ից հետո տեղի ունեցած իրադարձությունների մասով կան հարցադրումներ Փառուխի դեպքերի և ՀՀ սուվերեն տարածք ներխուժելու վերաբերյալ՝ 2021 թվականի մայիսին և նոյեմբերին, 2022 թվականի սեպտեմբերին։ Այս երկու հարցերը՝ ԼՂ-ի նոր շփման գոտի և ՀՀ սուվերեն տարածք ներխուժումները տարբեր հարթություններում են․ առաջինը ռուս խաղաղապահների պատասխանատվության գոտում տեղի ունեցած ներխուժում է, երկրորդը ՀԱՊԿ պատասխանատվության գոտի ներխուժում է, և այս փաստերի արձանագրումը, դրանց վերաբերյալ դիրքորոշումը, քաղաքական գնահատականը, որից կարող են բխել գործողություններ, դրանք պահանջելը իմ պարտքն է, խնդիրների մասին խոսելը հակառուսականություն չէ»։
Հարցազրույցն ամբողջությամբ՝ տեսանյութում։
Ռոբերտ Անանյան
