Քաղաքականություն
25.10.2022 | 13:32
Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսսին հայտարարել է, որ կազմակերպության փորձագետները կստուգեն Ուկրաինայում գտնվող երկու միջուկային օբյեկտները՝ Ռուսաստանի կողմից, այսպես կոչված, «կեղտոտ ռումբ»՝ ռադիոակտիվ նյութ պարունակող պայթուցիկ սարք ստեղծելու մեղադրանքներից հետո։ Այս մասին տեղեկանում ենք ՄԱԳԱՏԷ-ի կայքից։
Ուկրաինայի արտաքին գործերի նախարար Դմիտրի Կուլեբան խնդրել է ՄԱԳԱՏԷ-ի ղեկավարին շտապ փորձագետներ ուղարկել՝ օբյեկտները ստուգելու համար։
Գրոսսիի խոսքով՝ այցերի նպատակն է «բացահայտել ցանկացած հնարավոր չհայտարարագրված միջուկային ակտիվություն և նյութ»։ Միաժամանակ, նա նշել է, որ մեկ ամիս առաջ ՄԱԳԱՏԷ-ն ստուգել է այդ վայրերից մեկը, և գործակալության փորձագետներն այնտեղ չհայտարարված ոչինչ չեն հայտնաբերել։
Այն, որ Ուկրաինան, իբր, պատրաստվում է «կեղտոտ ռումբ» պայթեցնել՝ Ռուսաստանին միջուկային զենք օգտագործելու մեջ մեղադրելու համար, հայտարարել է ՌԴ պաշտպանության նախարար Սերգեյ Շոյգուն ՆԱՏՕ-ի չորս երկրների պաշտպանության նախարարների հետ հեռախոսազրույցում։
Տաթև Ֆռանգյան
