Ռուսաստանի բանակի խնդիրները խորանում են վատ հրամանատարության պատճառով․ բրիտանական հետախուզություն

Մեծ Բրիտանիայի հետախուզությունն ուկրաինական պատերազմի վերաբերյալ այսօրվա զեկույցում անդրադարձել է ռուսական բանակի հրամանատարությանը, գրում է BBC-ի ռուսական ծառայությունը։

Նշվում է, որ պատերազմի ութերորդ ամսվա վերջում Ռուսաստանի ռազմական ղեկավարության հիմնական մասն ավելի պակաս հաջողությամբ է իր գործառույթները կատարում։ Մարտավարական մակարդակում, հավանական է, նոր մոբիլիզացվածներին կազմակերպելու և ղեկավարելու ունակ կրտսեր սպայակազմի ավելի մեծ պակաս կա։

«Ականատեսների վկայությունների համաձայն՝ հոկտեմբերի 15-ին Բելգորոդի մարզում հրաձգությունը կարող էր տեղի ունենալ այն բանից հետո, երբ սպաներից մեկը վիրավորական մեկնաբանություններ է արել ազգային փոքրամասնությունների ներկայացուցիչ նորակոչիկների մասին (այդ տեղեկությունը ոչ ոք չի հաստատել): Կրտսեր սպաների մակարդակով վատ հրամանատարությունը, ամենայն հավանականությամբ, կվատթարացնի առանց այն էլ վատ բարոյական վիճակը և ստորաբաժանումների համախմբվածությունը ռուսական ուժերի շատ հատվածներում»,- նշում են զեկույցի հեղինակները։

Նաև ասվում է, որ 2022 թվականի փետրվարի  ներխուժման տարբեր փուլերում օպերատիվ հրամանատարություն իրականացրած հինգ գեներալներից չորսն այժմ հեռացվել են աշխատանքից։ Նրանց փոխարինողները դեռ քիչ բան են արել ռուսական զինված ուժերի մարտական բարելավման համար։

«Հրամանատարությունում շարունակականության բացակայությունը, հավանաբար, կլինի ավելի ավերիչ, քան կարող էր լինել այլ երկրներում, քանի որ ռուսական ռազմական դոկտրինի համաձայն՝ պլանների մշակումը հիմնականում տեղի է ունենում անձամբ հրամանատարի կողմից»,- ասվում է  զեկույցում։

Էմմա Չոբանյան