Պրահայում ընթանում է ԵՄ առաջնորդների հանդիպումը

Եվրամիության երկրների ղեկավարները հավաքվել են Պրահայում՝ քննարկելու Ուկրաինային աջակցելու և էներգետիկ ճգնաժամի կարգավորումը։ Գագաթնաժողովի մասնակիցները նախատեսում են քննարկել Ռուսաստանի հետ պատերազմի մեջ գտնվող Ուկրաինային ֆինանսական, քաղաքական, ռազմական և հումանիտար օգնությունը, ինչպես նաև էներգետիկ ճգնաժամը։ Ուկրաինայի նախագահ Վլադիմիր Զելենսկին ծրագրում է քննարկումներին մասնակցել տեսակոնֆերանսի միջոցով, գրում է Անադոլու գործակալությունը։

Ավելի վաղ ԵՄ-ն խոստացել էր Ուկրաինային 9 միլիարդ եվրոյի չափով ֆինանսական օգնություն տրամադրել։ Ավելին, արդեն փոխանցվել է 1 միլիարդ եվրոյի տրանշ։ Կիևը հայտարարել է, որ հույս ունեն արագացված գործընթացով ֆինանսական աջակցություն ստանալ։

ԵՄ առաջնորդների գագաթնաժողովի օրակարգային մեկ այլ կարևոր հարց է էներգետիկ ճգնաժամը և դրա հետևանքները ողջ Եվրոպայի համար։

Հանդիպման մասնակիցները կքննարկեն էներգակիրների պահանջարկի, ինչպես նաև դրա սպառման կրճատման հնարավորությունը, էներգամատակարարման անվտանգությունը, էներգակիրների գների նվազումը, որոնք վերջին մեկ տարվա ընթացքում կրկնապատկվել են։ Այս առումով բնական գազի սահմանային գնի թեման օրակարգային հիմնական կետերից է։

Եվրոպական խորհրդի ղեկավար Շառլ Միշելն ասել է, որ հանդիպման մասնակիցները «կկարողանան բոլոր հրատապ հարցերը քննարկել առավել հարմարավետ մթնոլորտում՝ առանց գրավոր որոշումներ կայացնելու»։

Եվրահանձնաժողովի նախագահ Ուրսուլա ֆոն դեր Լեյենն իր հերթին ասել է, որ հանդիպման մասնակիցները կքննարկեն գնային սահմանաչափի հետ կապված բոլոր հնարավոր քայլերը և հույս ունեն հասնել լավ արդյունքի։

«Մենք պատրաստվելու ենք հոկտեմբերի 20-21-ը նախատեսված ԵՄ գագաթնաժողովին»,- ասել է ֆոն դեր Լեյենը։

Տաթև Ֆռանգյան