Ռուսաստանը յուրացրել է Զապորոժյեի ԱԷԿ-ը. ուկրաինացի աշխատակիցներին սպառնում են «Ռոսատոմ» տեղափոխվելուց հրաժարվելու դեպքում ուղարկել ռազմաճակատ

Վլադիմիր Պուտինը հրամանագիր է ստորագրել Զապորոժյեի ԱԷԿ-ը Ռուսաստանին փոխանցելու մասին։ Կրեմլն այսպիսով փորձում է օրինականացնել ուկրաինական կայանի յուրացման գործընթացը, որը շարունակվում է արդեն մի քանի ամիս, գրում է BBC-ի ռուսական ծառայությունը։

Այն բանից հետո, երբ Ռուսաստանը «հանրաքվեներ» անցկացրեց Ուկրաինայի օկուպացված տարածքներում և պաշտոնապես բռնակցեց դրանք, ավելի քան յոթ ամիս ռուսական օկուպացիայի տակ գտնվող Զապորոժյեի ատոմակայանի ուկրաինացի անձնակազմին սպառնացել են, որ նրանց կարող են ստիպել կռվել Ռուսաստանի կողմից, եթե նրանք չստորագրեն փաստաթղթեր «Ռոսատոմ»-ում աշխատանքի անցնելու մասին, BBC-ին հաստատել են Ուկրաինայի միջուկային էներգետիկայի ոլորտին քաջատեղյակ աղբյուրները։

Պուտինի հրամանագրում ասվում է, որ այժմ ԶԱԷԿ-ը կշահագործվի «ինքնուրույն կամ այլ կազմակերպությունների ներգրավմամբ» մի քանի օր առաջ ստեղծված «Զապորոժիեի ատոմային էլեկտրակայանի օպերացիոն կազմակերպություն» ԲԲԸ-ի կողմից։

Փաստաթղթում նշվում է նաև, որ մինչև սեպտեմբերի 30-ը (այսպես կոչված, Զապորոժիեի շրջանի Ռուսաստանին միանալու մասին համաձայնագրի ստորագրման ամսաթիվը) տրված «աշխատանք վարելու իրավունքի թույլտվությունները (լիցենզիաները)» կշարունակեն գործել մինչև «Ռուսաստանի Դաշնության օրենսդրությանը համապատասխան թույլտվությունների տրամադրումը»:

Ուկրաինական «Էներգոատոմը» պատասխանել է, որ ԶԱԷԿ-ը կշարունակի աշխատել Ուկրաինայում՝ ուկրաինական օրենսդրության համաձայն, Ուկրաինայի էներգետիկ համակարգում։ Նրանք նաև հիշեցրել են նախագահ Զելենսկու հրամանագիրը, ըստ որի՝ ուժը կորցրած են ճանաչվում ուկրաինական տարածքների բռնակցման մասին Պուտինի հրամանագրերը և նրա ցանկացած այլ որոշում, ակտ և պայմանագիր։

Տաթև Ֆռանգյան