25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
ԵՄ երկրներին խորհուրդ է տրվել խնայել գազը
Քաղաքականություն
03.10.2022 | 22:38
Եվրամիության երկրները պետք է 9-13 տոկոսով նվազեցնեն գազի սպառումը, որպեսզի ջեռուցման սեզոնի ընթացքում ամբողջությամբ չսպառեն պահեստարանների պաշարները՝ 2022 թվականի նոյեմբերի 1-ից Ռուսաստանից մատակարարումների ամբողջական դադարեցման դեպքում։ Այս մասին ասված է Էներգետիկայի միջազգային գործակալության եռամսյակային զեկույցում, որը հրապարակվել է այսօր, գրում է DW-ի ռուսական ծառայությունը:
Եթե ջեռուցման սեզոնի ընթացքում ԵՄ երկրները կրճատեն գազի սպառումը 9 տոկոսով՝ համեմատած վերջին հինգ տարիների միջին ծավալի հետ, ապա կկարողանան գազի պահեստավորման օբյեկտների լիցքավորման մակարդակը պահպանել մոտ 25 տոկոսի սահմաններում, հաշվարկել է Էներգետիկայի միջազգային գործակալությունը։
Սպառման 13 տոկոսով կրճատման դեպքում այս ցուցանիշը կկազմի 33 տոկոս, ասվում է եվրոպական գազի շուկայի վերլուծության հիման վրա պատրաստված զեկույցում։ Այս սցենարը հաշվի է առնում հեղուկ բնական գազի (LNG) մատակարարման հնարավոր նվազումը, ընդգծել է գործակալությունը։
2022 թվականի հունվարից մինչև օգոստոս Եվրոպայում գազի պահանջարկը տարեկան կտրվածքով նվազել է գրեթե 10 տոկոսով։ Միաժամանակ, սակայն, LNG-ի պահանջարկը կտրուկ աճել է։
Ուկրաինա ռուսական ներխուժման և Ռուսաստանից ԵՄ երկրներ գազի մատակարարման դադարեցման ֆոնին եվրոպական պետությունները զգալիորեն մեծացրել են իրենց կարողությունները LNG-ի ներկրման ոլորտում։
Ըստ վերլուծաբանների՝ հենց LNG-ի վաճառքն է վճռորոշ դերակատարություն ունենալու մատակարարումների ճկունության և հուսալիության վրա։
Տաթև Ֆռանգյան
