18.08.2026 | 21:12
Ապօրինի ձեռնարկատիրության դեպք է բացահայտել․ առգրավվել է մեծ քանակի կեղծ խմիչք
Թուրքիայում գնաճը հասել է 24 տարվա առավելագույնին՝ գերազանցելով 83 տոկոսը
Քաղաքականություն
03.10.2022 | 23:30
Թուրքիայում գնաճը սեպտեմբերին հասել է 24 տարվա նոր առավելագույնին՝ գերազանցելով 83 տոկոսը, այն բանից հետո, երբ Կենտրոնական բանկը նվազեցրել է տոկոսադրույքները՝ չնայած գների աճին։ Այս մասին հաղորդում է Agence France-Presse-ը՝ վկայակոչելով պաշտոնական տվյալները, փոխանցում է Turkish Minute-ը։
Թուրքիայի դրամավարկային քաղաքականություն մշակողները հակազդում են գնաճի դեմ պայքարելու համար Կենտրոնական բանկի տոկոսադրույքների բարձրացման համաշխարհային միտումին: Սակայն նախագահ Ռեջեփ Թայիփ Էրդողանը բազմիցս քննադատել է բարձր տոկոսադրույքները՝ դրանք անվանելով իր «ամենամեծ թշնամին»։
Թուրքիայի վիճակագրական ինստիտուտն այսօր հայտարարել է, որ սեպտեմբերին երկրում տարեկան գնաճն ավելացել է՝ հասնելով 83,45 տոկոսի՝ օգոստոսի 80,2-ի դիմաց։ Լիրայի փոխարժեքն էլ հասել է նոր ռեկորդային նվազագույնի․ 18,56 լիրա՝ մեկ դոլարի դիմաց:
Թուրքիայի ընդդիմության առաջնորդներն ու շատ թուրքեր, սակայն, այլևս չեն հավատում պաշտոնական տվյալներին։
Թուրքիայի ENAG գիտահետազոտական ինստիտուտի անկախ տնտեսագետների կողմից հրապարակված ամենամսյա ուսումնասիրությունը նույնպես ցույց է տալիս, որ գներն աճում են շատ ավելի բարձր տեմպերով, քան պաշտոնական տվյալներն են։ ENAG-ը նշում, է որ սպառողական տարեկան գնաճը սեպտեմբերին հասել է 186,27 տոկոսի՝ օգոստոսի 181,37 տոկոսի դիմաց:
Էմմա Չոբանյան
