Պուտինը Ռուսաստանի քաղաքացիություն է տվել Սնոուդենին

ՌԴ նախագահ Վլադիմիր Պուտինը հրամանագիր է ստորագրել ամերիկացի Էդվարդ Սնոուդենին քաղաքացիություն շնորհելու մասին։  Սնոուդենն ավելի քան ինը տարի ապրում է Ռուսաստանում՝ ԱՄՆ հետախուզական գործակալության  կողմից զանգվածային հսկողության շուրջ տեղեկատվության բացահայտումից հետո, գրում է BBC-ի ռուսական ծառայությունը։

Երկուշաբթի օրը հրապարակված Պուտինի  հրամանագրում նշված է 72 անձի անուն, որոնց նա քաղաքացիություն է շնորհում, այդ թվում՝ Սնոուդենին: Կրեմլը հատուկ չի մեկնաբանել նրան քաղաքացիություն շնորհելը։

Ազգային անվտանգության գործակալության նախկին աշխատակիցը Ռուսաստանի քաղաքացիություն ստանալու համար դիմել էր դեռ 2020 թվականի նոյեմբերին։ Նա և  կինը՝ Լինդսի Միլսը, այդ ժամանակ երեխայի էին սպասում։ Սնոուդենն ընդգծել էր, որ ինքը և իր կինը «կմնան ամերիկացի» և կմեծացնեն իրենց որդուն «ամերիկյան արժեքներին համապատասխան», ներառյալ՝ իրենց կարծիքն արտահայտելու ազատությունը:

Սնոուդենը Ռուսաստանում է 2013 թվականի հունիսից։ 2014 թվականի օգոստոսին նա երեք տարով կացության թույլտվություն էր ստացել, 2017 թվականին այն երկարացվել էր։ 2021 թվականի հոկտեմբերի վերջին Սնոուդենը ստացել էր Ռուսաստանում անժամկետ բնակության թույլտվություն։

Սնոուդենը Washington Post և Guardian թերթերի լրագրողներին տեղեկություններ էր տրամադրել լայնածավալ հսկողության մասին, որն իրականացրել է Ազգային անվտանգության գործակալությունը։ Արտահոսքից հետո նա հեռացել էր  Հոնկոնգ, այնտեղից էլ՝ Մոսկվա։ Մոսկվայի «Շերեմետևո» օդանավակայանում նա ավելի քան մեկ ամիս անցկացրել էր տարանցիկ գոտում։

Տաթև Ֆռանգյան