Ռուսական ԶԼՄ-ները ուղեցույց են ստացել Պուտինի աշխատակազմից՝ ինչպես լուսաբանել մասնակի մոբիլիզացիան

ՌԴ նախագահ Վլադիմիր Պուտինի կողմից «մասնակի մոբիլիզացիայի» մասին հայտարարելուց անմիջապես հետո (չնայած իրականում այն լիարժեք է), պետական և իշխանամետ լրատվամիջոցներն ուղեցույց են ստացել, թե ինչպես պետք է լուսաբանել այս իրադարձությունը։ Ուղեցույցը, որը պատրաստվել է Ռուսաստանի Դաշնության նախագահի աշխատակազմի կողմից, հայտնվել է Meduza-ի տրամադրության տակ:

Ըստ լրատվականի՝ փաստաթղթում ասվում է, որ Ռուսաստանը հաղթել է պատերազմներում, երբ նրա բնակիչները հավատում էին, որ «ժողովրդական պատերազմ» է եղել։ Ուստի, եզրակացնում են ուղեցույցը կազմողները, հիմա ռուսներին պետք է փոխանցել մեկ հիմնական թեզ՝ «Ռուսաստանի ժողովուրդը պետք է համախմբվի ՆԱՏՕ-ի սպառնալիքի դեմ»։

Ըստ Կրեմլի՝ դաշինքը մտադիր է «մասնատել ու թալանել» Ռուսաստանը։

«Մենք այլևս չենք կարող մի կողմ կանգնել և պատասխանատվության ողջ բեռը դնել պայմանագրային զինծառայողների և Դոնբասի ժողովրդական միլիցիայի վրա, առաջնագիծն ավելի քան 1000 կիլոմետր է, ռուս զինվորներն ու ռուս ժողովուրդը սպանվում են ՆԱՏՕ-ի զենքերից, ՆԱՏՕ-ի վարձկանների և ահաբեկիչների կողմից»,- այսպես են առաջարկում առաջարկությունները մշակողները ռուսաստանցիներին համոզել մոբիլիզացիայի անհրաժեշտության հարցում։

Որպես մարդկանց զանգվածաբար ռազմաճակատ ուղարկելու ևս մեկ պատճառ հեղինակներն առաջարկում են անվանել ռուսական սահմանային տարածքների և 2014 թվականին բռնակցված Ղրիմի գնդակոծությունները։

Տաթև Ֆռանգյան