07.10.2026 | 23:48
Արթուր Դանիելյանը կալանավորվեց
Ֆրանսիայի ԱԳՆ-ն՝ Factor.am-ի հարցմանն ի պատասխան․ Ադրբեջանական ուժերի առաջխաղացումը սպառնալիք է ՀՀ տարածքային ամբողջականությանը
Քաղաքականություն
20.09.2022 | 21:33
Ադրբեջանական ուժերի առաջխաղացումը սահմանի որոշ հատվածներում սպառնալիք է Հայաստանի Հանրապետության տարածքային ամբողջականության համար։ Factor.am-ի հարցմանն ի պատասխան՝ այս մասին հայտնել է Ֆրանսիայի ԱԳՆ-ը։
«Հայաստան-Ադրբեջան սահմանային գոտում տեղի ունեցած լուրջ բախումներից և հայկական տարածքի մի քանի բնակավայրերի հրթիռակոծությունից հետո, սեպտեմբերին՝ ՄԱԿ-ի Գլխավոր վեհաժողովի բացմանը նախորդող շաբաթվա ընթացքում, ՄԱԿ-ի Անվտանգության խորհրդում նախագահող Ֆրանսիան առաջարկել է, որպեսզի երկու միջադեպերի վերաբերյալ իրավիճակը քննարկվի Անվտանգության խորհրդում։ Այդ առիթով Ֆրանսիան կոչ է արել խստորեն պահպանել հրադադարը։ Հայաստան-Ադրբեջան սահմանի սահմանագծումը պետք է որոշվի բացառապես բանակցությունների միջոցով։ Մենք նշել ենք, որ ադրբեջանական ուժերի առաջխաղացումը սահմանի որոշ հատվածներից այն կողմ սպառնալիք է Հայաստանի Հանրապետության տարածքային ամբողջականությանը, որը պետք է հարգվի»,- ասվում է Ֆրանսիայի ԱԳՆ-ի՝ մեզ փոխանցված պատասխանում։
Նշվում է, որ Ֆրանսիան հայտարարել է, որ ադրբեջանական զինուժը պետք է վերադառնա իր ելման դիրքերը, և որ Ֆրանսիան խրախուսել է կողմերին վերսկսել երկխոսությունը՝ այս բախումներին առնչվող և դրանից բխող բոլոր հարցերի կարգավորմանը բանակցային ճանապարհով հասնելու համար:
«Որպես Մինսկի խմբի համանախագահ և Եվրամիության անդամ երկիր՝ Ֆրանսիան կշարունակի աջակցել հրադադարի տևական պահպանմաըն և եռակողմ հայտարարություններով կողմերի ստանձնած պարտավորությունների կատարմանը, ինչպես նաև Եվրոպական խորհրդի նախագահի միջնորդական ջանքերին»,- եզրափակել են Ֆրանսիայի ԱԳՆ-ից։
Հիշեցնենք, որ սեպտեմբերի 13-ին ՀՀ ինքնիշխան տարածքի նկատմամբ ադրբեջանական ագրեսիայի սկսվելուց հետո կայացած ՀՀ ԱԽ նիստում որոշում էր կայացվել դիմել ոչ միայն ՌԴ-ին և ՀԱՊԿ-ին, այլ նաև ՄԱԿ-ի Անվտանգության խորհրդին, որտեղ այժմ նախագահող Ֆրանսիան նախաձեռնել էր Հայաստանի դիմումի հիման վրա նիստ հրավիրելու գործընթացը։
Տաթև Ֆռանգյան
