04.11.2026 | 11:35
Նարեկ Գրիգորյանի ճեպազրույցը՝ ՈՒՂԻՂ
Ռուսաստանը հետապնդում է պատերազմի հակառակորդներին․ ՄԱԿ-ի մարդու իրավունքների խորհուրդ
Քաղաքականություն
12.09.2022 | 22:20
Ռուսաստանի իշխանությունները հետապնդում են ուկրաինական պատերազմի հակառակորդներին և հետագա միջոցներ են ձեռնարկում՝ հավաքների և խոսքի ազատությունը սահմանափակելու համար։ Այս մասին հայտարարել է ՄԱԿ-ի մարդու իրավունքների գերագույն հանձնակատարի պաշտոնակատար Նադա Ալ-Նաշիֆը, գրում է VOA-ն։
Երկուշաբթի Ժնևում մեկնարկել է Անվտանգության խորհրդի հերթական նիստը։ Ուկրաինա զինված ներխուժումից հետո Ռուսաստանը ձայների մեծամասնությամբ դուրս է մնացել դրա կազմից։
«Ռուսաստանի Դաշնությունում հալածանքները և սահմանափակող միջոցներն ու ճնշումները մարդկանց դեմ, ովքեր դեմ են արտահայտվում Ուկրաինայում պատերազմին, խարխլում են սահմանադրորեն երաշխավորված հիմնարար ազատությունները, ներառյալ հավաքների, միավորումների և արտահայտվելու ազատության իրավունքը»,- ասել է Ալ-Նաշիֆը:
Նա նաև նշել է, որ Ռուսաստանի իշխանությունները խախտում են տեղեկատվության ազատ հասանելիության իրավունքը՝ ճնշում գործադրելով լրագրողների վրա, գրաքննություն մտցնելով և արգելափակելով կայքերի հասանելիությունը։
Մի շարք իրավապաշտպան կազմակերպություններ ավելի վաղ կոչ էին արել Խորհրդին ընդունել բանաձև՝ Ռուսաստանում մարդու իրավունքների ենթադրյալ խախտումները հետաքննող անկախ մարմին ստեղծելու պահանջով։
Ուկրաինա լայնածավալ ներխուժման սկզբից ի վեր Ռուսաստանում ձերբակալվել է հակապատերազմական ցույցերի ավելի քան 16 հազար մասնակից։ Ավելի քան 3 հազար արձանագրություն է կազմվել բանակը վարկաբեկելու վարչական հոդվածով, 100-ից ավելի քրեական գործ է հարուցվել, այսպես կոչված, «զինվորական ֆեյքերի» հոդվածով։ Տասնյակ մարդիկ, այդ թվում՝ հայտնի քաղաքական գործիչներ Վլադիմիր Կարա-Մուրզան և Իլյա Յաշինը, հայտնվել են ճաղերի հետևում այս հոդվածով։ Երկու հոդվածներն էլ հայտնվեցին օրենսդրության մեջ պատերազմի սկսվելուց անմիջապես հետո։ Այս ընթացքում նաև հազարավոր կայքեր են արգելափակվել։
Տաթև Ֆռանգյան
