04.11.2026 | 21:59
Ալեք Մանուկյան փողոցում երթևեկության կազմակերպման փոփոխություն կկատարվի
ՌԴ քաղաքային պատգամավորները սկսել են պահանջել Պուտինի հրաժարականը
Քաղաքականություն
12.09.2022 | 19:31
Մոսկվայի 18 շրջանների, Սանկտ Պետերբուրգի և Կոլպինոյի քաղաքային պատգամավորները հայտարարություն են տարածել՝ պահանջելով ՌԴ նախագահ Վլադիմիր Պուտինի հրաժարականը։ Երկուշաբթի՝ սեպտեմբերի 12-ին, դիմումը Թվիթերի իր միկրոբլոգում հրապարակել է Սանկտ Պետերբուրգի քաղաքային խորհրդի պատգամավոր Քսենյա Տորստրեմը։
Տորստրեմը կոչ է արել մունիցիպալ մյուս պատգամավորներին՝ միանալ հայտարարությանը։
«Մենք՝ Ռուսաստանի մունիցիպալ պատգամավորներս, կարծում ենք, որ նախագահ Վլադիմիր Պուտինի գործողությունները վնասում են Ռուսաստանի և նրա քաղաքացիների ապագային։ Մենք պահանջում ենք Վլադիմիր Պուտինի հրաժարականը Ռուսաստանի Դաշնության նախագահի պաշտոնից»,- ասվում է հայտարարության տեքստում։
Բողոքի տակ ստորագրել է մոտ 20 պատգամավոր։ Տորստրեմն ընդգծել է, որ «խնդրագրի տեքստը հակիրճ է» և որևէ մեկին չի «վարկաբեկում»։
DW-ն հայտնում է, որ քաղաքային խորհրդի պատգամավորների նմանատիպ հայտարարությունները սկսել են հայտնվել անցյալ շաբաթ։
Սեպտեմբերի 7-ին Սանկտ Պետերբուրգի Սմոլնինսկոյե մունիցիպալիտետի պատգամավորների խորհուրդը որոշում է կայացրել դիմել Պետդումա՝ կոչ անելով պաշտոնանկ անել Պուտինին պետական դավաճանության պատճառով։ Նրանք դրա ապացույցն են անվանել նախագահի որոշումների հետևանքները՝ ռուսական բանակի ստորաբաժանումների ոչնչացումը, Ռուսաստանի Դաշնության երիտասարդ և աշխատունակ քաղաքացիների զոհվելն ու վիրավորվելը, Ռուսաստանի տնտեսությանը վնաս պատճառելը, ՆԱՏՕ-ի ընդլայնումը, ինչպես նաև ուկրաինական բանակը ժամանակակից արևմտյան տեխնիկայով զինվելը, ինչը հակասում է նրա «ապառազմականացման» հռչակված նպատակին։
Տաթև Ֆռանգյան
